以西结书 16章15节 到 16章34节   背景资料  上一笔  下一笔
Tùi第15节开始,chit段经文真清楚指出以色列人民堕落,弃sak上帝ê罪行。先知以西结传出上帝ê信息,ná亲像先知何西阿ê信息仝款,是用上帝kah以色列民族之间ê「夫妻」关系来譬喻,指责以色列人民弃sak家己ê丈夫,去kah其他ê情人行淫,这表示in弃sak了上帝,去拜其它偶像神明。

第15到19节,chit节讲出以色列民族并无记念上帝对伊ê厚爱,mā bē珍惜上帝赏赐各种恩典。颠倒地,利用家己ê美貌kah名气「放荡纵情,来者不拒」,chit种行为kah妓女仝款。In kā家己美丽ê衫裤「装饰拜神明ê所在」,想beh吸引人去kah in行淫,in ê行为就kah庙妓仝款。Koh khah hō͘上帝伤心ê,in竟然the̍h上帝赏赐kā in赐福ê「金银珠宝铸造」偶像神明来拜,iáu kā上帝赏赐kā in赐福ê衫裤、「粮食」,而且是「上等面粉、橄榄油、蜂蜜」等贵重珍品当做祭物献hō͘ chiah-ê in ê手「铸造」出来ê「偶像」神明。这kah主前第八世纪ê先知何西阿所谴责当时北国以色列人民ê行踏完全仝款(参考何西阿书二:5、8)。

第20到21节,「你the̍h你kah我生ê kiáⁿ当牲祭献hō͘偶像」、「iáu刣死我ê kiáⁿ当牲祭献hō͘偶像」,chiah-ê句话lóng真清楚指出北国以色列kah南国犹大ê人民bat kā家己kiáⁿ献祭hō͘巴力等偶像神明,而且chit种行为又koh是tùi国王带头teh做(参考列王记下十六:3、十七:17、廿一:6)。Á chiah-ê行为lóng是上帝严厉禁止ê(参考申命记十八:10),mā是上帝看做siōng讨厌ê行为。

第22节,chit节thang对照第6节。

第23到26节,「你惨了!你受灾了!」chit种用词早tī先知何西阿ê时代就用teh警告北国以色列人民弃sak上帝(参考何西阿书七:13),现tī先知以西结用来谴责犹大ê以色列人民,讲in án-ne做,kan-taⁿ会带来灭亡而已。所谓「邪恶ê事」,Tī圣经作者认为就是去拜偶像。而且in拜偶像ê行为是处处可见,「街头巷尾」lóng有,淫乱ê严重,hō͘ in原本尊贵、高雅ê气质全部丧失殆尽,chiah-ê恶质ê行踏hō͘上帝非常受气。

第27到29节,chit三节lóng是进一步用来指责犹大国ê领导者,对上帝无信心,不听从先知ê劝告,而去勾结「埃及」(第26节)、「亚述」(第28节)、「巴比伦」(第29节)。这说明in kan-taⁿ想beh用用政治ê方法来取得国家安全保障。先知以赛亚就bat警告in讲,这是愚戆ê念头kah做法(参考以赛亚书二十:5—6、三十:1—3、三十一:1)。M̄-koh先知ê信息hō͘ in知影,若无上帝伸手庇护,就算拥有强大ê军事武力mā是枉然。

第30到34节,chit段经文koh一pái说明以色列民族所做chit种弃sak上帝,去拜偶像神明行为ê泛滥行踏,就「像无耻ê妓女」仝款,连一点见笑感mā无。M̄-koh in是比妓女koh khah惨,妓女是为tio̍h thàn钱出卖肉体,m̄-koh以色列民族根本就是只为tio̍h满足淫乱ê心去行淫,iáu「赠送礼物倒贴情郎」,只为tio̍h满足家己ê欲望,「出钱去雇情郎」,这真正hō͘上帝无法度容忍。

重新查询 专卷研经 以西结书系列
错误回报,请联系