以西结书第一章1节到第三章27节，chit段经文真清楚记载tio̍h先知以西结hō͘上帝呼召ê经过。这kah其它先知书teh绍介先知ê写法大无相仝；一般来讲，只要phah开先知文献来看，真容易就会看tio̍h一个共同特色，作者lóng会先绍介先知本身ê时代背景，以及hō͘上帝呼召ê经过（参考耶利米书第一章1到1节、何西阿书第一章1节、阿摩司书第一章1节）。M̄-koh chit本经册却用长到三章ê篇幅teh绍介先知以西结受呼召ê经过，kah用身躯语言来表示上帝beh伊传讲ê信息。

Chit本经册siōng特别ê所在，就是大部分是使用第一人称来叙述，表示这是先知本人teh述说家己ê性命经历。不过，chit本经册虽然是用以西结ê名称，却真少交带先知以西结ê家庭背景，mā因为án-ne有关先知以西结ê身世背景认bat mā真少。唯一清楚ê，就是伊活跃ê时期tī主前593到571年之间。

第1到3节，chit三节mā是chit本经册ê序言。短短三节经文却真清楚讲出时间、地点，thang明白此经册ê社会晓背景。

Chia讲时间是「第三十年四月初五日」，第2节则真清楚讲he是「约雅斤王受掠后第五年」，而约雅斤hông掳去巴比伦ê时间，大约是tī主前598 á是597年。伊在位时间非常短，只有短短三个月而已（参考列王记下廿四：8）。因为án-ne，「受掠后第五年」，ná应该就是tī主前593 á是592年之间。M̄-koh这「三十年」是怎样算？圣经学者各有无仝见解。有一种讲法是：先知以西结是tī主前623年出世tī耶路撒冷。Chia ê「三十年」，真可能就是teh指先知以西结三十岁ê时chūn，得tio̍h上帝呼召ê信息，这是照摩西律法规定，祭司是tùi三十岁开始服事（参考民数记四：23、37）。Án-ne tú好thang符合顶面所讲「受掠后第五年」ê时间。

先知以西结看见「天开」，并且「看tio̍h上帝ê异象」，chit句话表示先知以西结kah上帝之间有特别ê关系。先知以西结是祭司，是「布西ê kiáⁿ」。伊「听见」上帝对伊讲话，mā感受tio̍h上帝ê「能力充满」tio̍h伊。Chia ê「能力」一词mā thang做「灵」、「手」字解释（参考以西结书三：14、22、八：1、三十三：22、三十七：1、四十：1）。