Chit章是由「耶和华文献」ê资料（第1到2节、第9到11节）、「以罗伊文献」ê资料（第3到8节、第12到14节），以及「祭司文献」ê资料（第16到18节）编辑而成。

Chit章主要teh说明以色列人án怎回应上帝透过摩西所颁布ê chiah-ê诫命、律法、规例。当摩西对in讲上帝颁布chiah-ê诫命、律法ê时，in lóng回答讲：「上主所吩咐一切ê命令，阮愿意顺从遵行。」（第3节、第7节）这是「立约」ê基本态度。Tio̍h注意ê是，圣经teh讲上帝kah人「立约」ê时，并m̄是对等ê「约」，是上帝颁布，人一定tio̍h遵行。这清楚说明人kah上帝是m̄-tio̍h等ê位阶。创世记作者清楚表示人犯罪ê意念是tùi「会亲像上帝」开始（参考创世记三：5），m̄-koh，人「无法度代替上帝」（参考创世记五十：19）。人是上帝亲手用他ê形像创造ê，因为án-ne，一定tio̍h顺从上帝ê旨意kah命令，chit点是立约一定tio̍h清楚ê观念。

Chit章mā ē-sái讲是kui个以色列民族大整合ê一章，因为是kui个民族kah上帝立约。因为án-ne chiah有「七十个以色列ê领袖」beh上山去晋见上帝，领受上帝颁布ê律法诫命。

Koh讲，立约siōng重要ê是用性命，á性命ê记号是血（参考利未记十七：11）。

第1到2节，上帝ài「摩西kah亚伦、拿答、亚比户，连同七十个以色列ê领袖tio̍h上山」到上帝hia去。M̄-koh只有摩西一个人「thang到」上帝ê「kah前」，其他以色列人lóng bē-tàng上山。因为he是上帝ê山，是神圣ê。Á这七十个以色列领袖，就是代表全体以色列人民。

第3到8节，摩西kā上帝tī山顶kā伊讲，落山后lóng一五一十kā以色列人民讲。Á以色列人民mā真清楚ê回应讲：「上主所吩咐一切，阮一定遵行。」chia并无说明上帝对摩西讲kóa甚么，m̄-koh tī第十九章5到6节有清楚记载，上帝ài摩西转告以色列人，in若遵守kah上帝所立ê约，in就是上帝ê子民，是事奉上帝ê祭司。

摩西就tī山下「起造一座祭坛，并khiā立十二支石柱；每一支石柱代表以色列十二支族ê一族」，用献祭来表示敬拜kah顺服上帝ê旨意。M̄-koh chia并无讲摩西所写落来ê「约册」是teh指toh一kóa，是m̄是十诫？Á是包含其它所说明ê约ê内容。Tio̍h注意，摩西the̍h献牲祭ê血「hiù tī人民身上」，说明这血是「照」上帝ê诫命kah以色列人「立约ê印记」。

第9到11节，真特别，说明上帝允准以色列ê七十位代表kah摩西、亚伦、拿答、亚比户同齐上山去晋见上帝。In算是真幸福ê人， ē-tàng亲目金金看见上帝，却无死去。