出埃及记 20章1节 到 20章17节   背景资料  上一笔  下一笔
Chit章thang讲是出埃及记siōng重要ê一章,记载有关十条诫命ê内容。Chit章全部lóng是「以罗伊文献」ê资料。kāchia记载有关十诫ê内容(第1到17节),对照申命记第五章6到22节,thang发见其中siōng大ê差别是tī第四诫有关守安息日ê规定。Tī出埃及记chia讲守安息日,是因为上帝创造天地ê关系,á tī申命记第五章soah讲是因为记念出埃及ê缘故。后者kah in进入迦南后ê生活必定有密切ê关系,in因为堕落,bē记得上帝ê诫命。因为án-ne,申命记koh一pái提醒in,bē记得上帝ê诫命,会为in带来亡国ê运命。Á bē记得上帝siōng常见ê态度,就是连安息日lóng bē记得。因为安息日是敬拜上帝ê日子,bē记得安息日,等于无koh敬拜上帝à。先知耶利米就bat严厉警告这会为以色列人民带来灭亡(参考耶利米书十七:19—27),后来果然应验ā。

另外,tī第五诫孝敬父母ê诫命上,出埃及记直接讲「tio̍h孝敬父母」,申命记则加上「tio̍h遵照我ê命令」,若án-ne做就ē-tàng「事事顺利」。

第三,tī第十诫,出埃及记讲「bē-tàng贪图别人ê房屋」chit件事pái tī第一位,m̄-koh tī申命记则「bē-tàng贪恋别人ê bó͘」列入优先。

其实,「十诫」chit位称,原本是teh指「十句话」。如果是十句话,十诫就是án-ne:
1.M̄-thang敬拜别ê神明。
2.M̄-thang为家己造任何偶像。
3.M̄-thang乱使用我ê名。
4.T io̍h谨守安息日做圣日。
5.Tio̍h孝敬父母。
6.M̄-thang刣死人。
7.M̄-thang奸淫。
8.M̄-thang偷the̍h。
9.M̄-thang做假证陷害人。
10.M̄-thang贪图别人ê财产。

Tùi顶面所讲ê十诫,mā thang kā它分做两个部分;其一是第一到四诫,这是属tī人对上帝应该有ê态度。这部分ê诫命ná亲像申命记第六章5节记载ê:「你tio̍h 尽心、尽性、尽力,疼上主— 你ê 上帝。(全民版)」Chit句话mā是kui本圣经ê基本教示。第二是第五到十诫,属tī人kah人之间ê关系。这第二ê部分mā thang以利未记第十九章18节b句所讲ê:「M̄ -thang 报仇,mā m̄ -thang 埋怨你本国ê 人民,tio̍h 疼厝边亲像家己(全民版)」kā chit两部分合起来,等于是十诫ê总和,mā是耶稣基督回答hit位教法律ê人ê答案(参考路加福音十:25— 37)。

十诫siōng基本ê结构tī第2节,chia讲:「我是上主 — 你 ê 上帝,bat
chhōa 你tùi 埃及地,tùi 做奴隶ê 家出来ê。(全民版)」Chit句话kah-ná是一个图章印记,真清楚说明这是属tī上帝ê法律,bē-tàng轻视、疏忽。颠倒地,是beh tiâu tiâu记tiâu。

第3节,「我以外,你 m̄ -thang 有别 ê 上帝。(全民版)」chit条诫命mā是大多数改革宗基督教会,以及希腊正教看做十诫ê第一诫。Mā thang án-ne讲,十诫实际上是只有一诫而已,就是这第一诫。用上帝做中心,以后ê九条诫命lóng是用chit-ê诫做基础。Bē记得chit-ê诫,其他ê lóng kā失去准则。以上帝当做人、事物等一切ê中心,chiah ē-tàng谈其他ê。

第4到7节,这是第二条诫命「bē-tàng为家己造任何偶像」。Ài beh特别注意ê是「bē-tàng为家己」,表示bē-tàng kā人看做偶像来拜。Koh讲,bē-tàng因为家己ê需要á制造偶像。Ná亲像出埃及记第三十二章记载,以色列人民为tio̍h满足家己ê需要,竟然tī旷野制造金牛崇拜。Á这金牛偶像神明,就是in tī埃及寄居生活所学tio̍h ê,是属tī生产ê神,mā是力量ê神明。M̄-koh上帝坚定ê命令,绝对无法度容忍以色列人民有chit种行为。

Chit条诫命iáu有附带要件,就是违背ê,会hō͘追究责任到kiáⁿ孙三、四代,m̄-koh顶真遵守ê,必定会得tio̍h上帝ê赐福到「千代kiáⁿ孙」。
Tio̍h注意第5节所讲ê,「恨恶」上帝ê人,其实就是teh指去拜偶像神明ê人。

第7节,这是第三诫命「bē-tàng乱使用我ê名」。「乱使用」一词,tī中文《和合本》用「妄称」,天主教《思高版本》mā是用「妄称」。Chit-ê词原本ê意思是teh指「无适当」,á是「无好ê动机」。意思是teh指不诚实ê方式,假借上帝ê名欺骗人。Chit种行为等于是teh亵渎上帝ê神圣仝款,bē-tàng原谅(参考利未记十九:12)。换句话讲,只要是用上帝ê名,无论是祈祷、讲话,lóng一定tio̍h顶真守tiâu绝对诚实ê要件。

Koh讲,「乱使用」mā是teh指称呼上帝ê名kah上帝ê本性不相符。Mā因为án-ne,犹太人就真惊惶直接称呼上帝。In认为上帝太神圣了,teh敬拜ê时恐惊因为称呼上帝ê名有误,致使亵渎了上帝ê神圣,因为án-ne,in ài用「天」来代表。这天mā teh表示创造kui个宇宙万物ê主宰ê意思。

第8到11节,这是第四诫命「tio̍h谨守安息日做圣日」。Ná亲像头前提过ê,对照申命记第五章12到15节,就会发见chia强调上帝ê创造,á申命记是为tio̍h记念出埃及脱离性命苦难á守安息日。

第七工歇困,所以六天内lóng ài认真工作,第七工歇困bē-tàng工作,包括「kiáⁿ、奴婢、牲畜,á是侨居ê外族人」等lóng tio̍h停止工作。因为人停止工作,包括奴婢在内,真自然tek,牲畜mā会跟tòe歇困停工。Tùi chia延伸出来ê,就是第七年安息年,大地mā因为án-ne得tio̍h喘息ê机会。
第12节,这是第五诫命「tio̍h孝敬父母」。Tùi这第五诫命开始,到第十诫命,lóng是讲tio̍h人kah人之间ê关系。

chit-ê诫命mā是有附带ê祝福,遵守chit-ê诫命ê人,thang tī khiā起ê土地上「享长寿」。Tùi「孝敬」延伸出来ê就是绝对禁止「咒骂父母」,chit种人一定tio̍h处死(参考出埃及记廿一:15、17)。

第13节,这是第六诫命「m̄-thang刣死人」。Chia ê「杀」原本是无任何受词,是teh指「bē-tàng杀害」ê意思,因为án-ne,伤害别人lóng是tī禁止之列。因为性命tùi上帝来,任何残害性命ê事,是一定tio̍h绝对禁止ê。

Koh讲,chia ê「杀害」,是teh指故意、蓄意ê行为。圣经中一再表示,上帝siōng无法度忍受有权力者杀害无辜ê性命。Chit款tāi-chì,上帝绝对bē赦免、原谅(参考列王记下廿四:4)。

第14节,这是第七诫命「m̄-thang奸淫」。奸淫,这是属tī男kah女之间不正当ê关系。M̄-koh mā附带有chiok厚ê宗教信仰意义。因为上帝kah以色列人民之间ê关系,就是一种婚姻ê夫妻关系。犯奸淫ê行为,等于teh侮辱对上帝忠实ê心灵。因为上帝ê子民一定tio̍h圣洁(参考利未记十九:1—2),圣洁ê子民,就一定tio̍h tùi清楚ê性关系开始做起。

第15节,这是第八诫命「bē-tàng偷the̍h」。Chia ê偷the̍h范围包括绑架别人ê奴隶。其实,chit-ê诫命mā隐含tio̍h一个基本信念:就是爱人如己(参考利未记十九:18)。这真清楚teh说明:上帝赏赐hō͘每一个人lóng够额。会偷the̍h,表示对上帝赏赐ê无信心,想beh贪得koh khah chē。Ná亲像tī旷野ê时,上帝tùi天顶降落吗哪,要求in一定tio̍h严守每工每人需要量「两公升」,bē-tàng多捡,表示对上帝绝对忠实。使徒保罗就指出,贪,就是拜偶像ê行为,chit种人不配当上帝国度ê子民(参考以弗所册五:5,歌罗西书三:5)。

第16节,这是第九诫命「bē-tàng做假证陷害人」。Chit条诫命mā说明诚实ê心灵ê重要性。假见证mā会害死无辜ê性命,等于是kah第六诫ê「杀害」仝款。为tio̍h beh防止有误判á是假证ê事发生,申命记第十九章15节规定,一定tio̍h有两个以上ê证人作证chiah ē-tàng hō͘诉讼案件成立。对tī做假证ê人,m̄免怜悯,「以眼还眼,以牙还牙,以手还手,以脚还脚」(参考申命记十九:21)。

第17节,这是第十诫命「bē-tàng贪图别人ê房屋;mā bē-tàng贪爱别人ê bó͘、奴婢、牛驴,á是其他物件。」原本是只有「bē-tàng贪别人ê财物」chit-ê句话。Teh进入迦南地了后,kā它写得koh khah细。Chia ê「贪」,指ê是夺取,用不正当ê手段得来ê。

重新查询 专卷研经 出埃及记系列
错误回报,请联系