出埃及记 2章11节 到 2章22节   背景资料  上一笔  下一笔
Chit段经文则绍介摩西后来关心家己ê同胞「被迫服苦役」ê事,tú好说明以色列人民ê教育基础就是家庭教育。家庭教育是由老母扮演siōng重要ê角色。因为án-ne,摩西虽然是tī埃及王宫长大,m̄-koh却自细汉心中就对以色列民族有真清楚ê认同感。

Tī chit段经文中,前后两pái看tio̍h摩西为「弱势者」出力。这tú好说明伊ê名ê含意;原本摩西chit-ê名ê意思,tī希伯来语kah「搝起来」同语音。这mā是表明救援、扶助ê意思。

第11到13节,摩西「长大了后」,tī中东地区表示已经有十三岁大ê意思。Chit时,伊常常「出去探望希伯来同胞」,而且亲目看tio̍h hit-ê杀害希伯来同胞ê埃及人,伊主动替chit-ê受害人报复,杀害hit-ê埃及人,并且kā伊埋葬。M̄-koh第13节却ē-tàng看出tī以色列人中间已经teh流传摩西身分ê问题。

第14到16节a句,m̄-koh当伊看见家己同胞希伯来人teh相phah,á上前去排解in之间ê纠纷ê时,却被拒绝,chiah发见家己虽然有认同,却无被接受,chit种情形mā发生tī后来伊进王宫去为以色列人民向国王参详拜托ê时,反tńg因为án-ne加重以色列人ê工作量,致使伊ê同胞koh khah痛恨伊(参考五:20—21)。Koh讲,第14节讲出chit-ê以色列同胞ê反应,mā hō͘摩西想tio̍h家己杀害hit-ê埃及人ê事,已经tī以色列人民中间teh传述,若是án-ne,chit-ê消息真紧to̍h会传入去王宫,伊ê性命一定会有危险。摩西知影koh khah án怎都无法度隐藏家己所做谋害埃及人ê事,因为án-ne「心内惊惶」。果然,kah伊所料想ê完全仝款,国王听tio̍h摩西所做ê事,认为这是一件相当严重ê大事,因为这是等于叛变,就án-ne,国王下令beh「刣摩西」,就án-ne,摩西开始逃亡ê生活。

第16节b句,摩西逃到「米甸」,这是设tī摩押地区南部,tī埃及ê东边。

米甸ê祖先就是亚伯拉罕kah伊ê细姨基土拉所生ê kiáⁿ ê后代(参考创世记廿五:2),chit-ê族群以骆驼经商为生,tī士师时代bat kah以色列人发生战争(参考士师记六:1—6)。Chia有一个祭司「叶特罗」,chit-ê名ê意思是teh指「神ê朋友」,表示伊kah所事奉ê神关系真好。

第16节b句到17节,摩西确实是一个真gâu伸张正义、主持公道ê人,á chit种人是上帝拣选成做奴仆应该有ê态度(参考创世记十八:19)。当伊看见叶特罗ê七个cha-bó͘-kiáⁿ teh phah水ê时被欺负,伊就上前去替叶特罗ê cha-bó͘-kiáⁿ主持公道。M̄-nā保护in,iáu替in phah水hō͘羊lim。

第18到22节,叶特罗听tio̍h cha-bó͘-kiáⁿ kā所发生ê事kā伊讲了后,就赶紧邀请摩西来厝里做客,伊因为án-ne留tī叶特罗厝里。叶特罗好款待摩西,koh kā家己ê cha-bó͘-kiáⁿ西坡拉嫁hō͘伊,伊生落来第一个kiáⁿ号名「革舜」,chit-ê名有含「寄居」、「驱逐」ê意思。


重新查询 专卷研经 出埃及记系列
错误回报,请联系