出埃及记 15章13节 到 15章18节   背景资料  上一笔  下一笔
头前有提起过,chit段诗歌真可能是后来加添入去ê,并m̄是摩西本来ê诗歌。因为第15节出现「以东」、「摩押」、「迦南ê居民」等名词,chiah-ê lóng m̄是过红海chìn前出现ê,却是进入旷野漂流了后chiah有ê。不过真清楚,chit段诗歌已经讲出当以色列人民行过红海,á埃及ê追兵lóng葬死海中ê事,确实是震撼了当时迦南地kah旷野地区真chē民族、国家。In开始担心以色列人民mā会亲像án-ne造成in重大ê伤害。

第13节,chia讲上帝有「无变ê疼」,chit句话讲出上帝爱ê特性。Tī圣经中,chit句形容上帝有「无变ê疼」ê用词一再出现。特别是tī诗篇中出现siōng chē,á先知ê文献mā bē少。

另外一方面,上帝「无变ê疼」mā kah「约」连做伙。上帝kah他ê子民所立ê约,就是建立tī爱ê基础上,而且无变ê疼,chit-ê约chiah ē-tàng成做永远ê约。

第14到16节,讲出以色列人民chiah经过红海,iáu未进入迦南地,就已经hō͘迦南地ê人,kah旷野中hiah-ê民族、部落lóng胆战心惊,m̄知án怎chiah好。Chit种吓(heⁿh)惊,并m̄是因为以色列民族真强悍,却是因为上帝亲手带领in,为in相刣,chiah hō͘埃及全军覆无,án-ne chiah是hō͘迦南地kah旷野之地ê民族吓(heⁿh)惊ê原因。

第17到18节,chia所讲ê「你ê山」,是teh指以色列人民khiā起ê迦南地。因为海岸线被非利士人控制tio̍h,直到大卫王时代chiah全部落tī以色列人民手中。M̄-koh因为是tī离海岸khah远ê丘陵地,反而成做比较安全ê所在,mā tī chit-ê地方,上帝栽培in、看顾in。因为án-ne,以色列人民心中一直存在tio̍h一个重要观念:上帝就是in君王。后来chit-ê观念开始有改变,tī先知撒母耳时代,in要求为in设立君王来统治in(参考撒母耳记上第八章)。

重新查询 专卷研经 出埃及记系列
错误回报,请联系