传道书 12章1节 到 12章14节   背景资料  上一笔
第十二章thang分做两个段落,第一个段落是第1到8节,是延续第十一章9节后面对少年人ê劝言,chia koh一pái提醒m̄-thang bē记得上帝chiah是性命ê主宰。第二个段落是第9到14节,mā是传道书ê结语。

第1节,「趁你少年ê时,ài会记得你ê创造主。」chia ê「趁」一词,表示「掠tiâu」、「紧掠tiâu」,原因「少年」时间是目nih-á久,真紧to̍h会过去。Chit节意思是teh指宇宙万物ê创造者上帝,他是性命ê主宰,是审判者。Tio̍h趁少年有活力ê时,学习认bat chit位创造宇宙万物ê主宰。

第2节,chia用「日头、月娘、星辰」,以及「云彩」,意思是teh指做一个人iáu活teh ê时chūn,千万ài会记得第1节所讲ê「创造主」。M̄-thang等到年老ā,chiah想beh chhōe上帝。

第3节,「手股头会phi̍h-phi̍h-chhoah」、「腿无力」、「嘴齿只chhun几支」、「目睭花,视线雾雾无清不清」等等,chiah-ê lóng teh形容一个人已经老态龙钟,体力衰弱ê时chiah想beh来接近上帝,á是beh学习认bat上帝。

第4节,「你ê耳á聋了,听无看tio̍h街上ê吵闹;推磨á是歌唱声音你听bē-tio̍h。」这是人衰老ê现象,有时会连讲话都无气力,á是想beh讲,却m̄知该讲kóa甚么。Mā ē-sái讲是臭耳lâng ê现象,听无看tio̍h别人讲话ê声音,甚至连敲锣phah鼓合tio̍h歌声ê声音,响亮如推磨一般mā是听无看tio̍h。Chit种人,就算传讲上帝ê信息hō͘伊听mā是枉然。「雀鸟á初唱,你就醒来」,表示困眠真浅,困bē去,天未光就醒起来;á是teh指耳鸣继续无停,ná亲像雀鸟á tī耳边叫个无停。以现代人ê状况来讲,就是走病院ê频率khah赢过去敬拜上帝。

第5节,「惊上高处,行路mā有危险」,意思是连beh行出门lóng会感觉无安全。「头毛斑白,精力衰退,性欲断绝,koh khah án怎都无法度挽回了」,chiah-ê话真清楚表示:chit时人已经是到à力不tùi心ê时。就算想beh学习,mā会感觉lóng无兴趣thang讲,á是听bē落去à。Á「向(ǹg)最后ê归宿地去」,表示行向死亡。Chit时chūn,「街上kā有哀号ê声音」,表示送葬ê队伍tī teh等待加入送殡ê行列,á是等待看chit种丧葬队伍经过。

第6节,chit节讲「银链á」、「金灯台」、「吊绳」、「水罐」等物件,chiah-ê原本都是串做伙,无法度分离ê,若是其中任何一件有损pháiⁿ、断裂ê时,chiah-ê器皿就会失去功效。作者用chit种方式来形容:做一个人tī性命teh beh达tio̍h终点ê时,chiah想ài会记得性命ê创造主,确实是缓不济急,无作用。

第7节,chit节为tio̍h án-ne段经文作一个总结,就是每一个人ê「身躯kā归还土粉」,表示无论是甚么款ê身世背景lóng仝款,人来自土粉,就iáu原tńg来到土粉去。「咱ê活气会归回赐性命ê上帝」,chit句话真清楚表示:tùi上帝来ê,就beh tńg来到上帝hia。

第8节,chit节应该是传道书ê总结。Mā回应了chit本经册siōng起头连续出现两pái ê「空虚,空虚」(参考一:2),表示这是真实ê结果,事实就是án-ne。当人ê性命结束ê时,一切lóng归回原位,性命会tńg来到上帝ê所在。

第9节,指传道者应该有ê特质,就是一位「明智者」,mā就是真实认bat上帝ê人。Chit种传道者,伊会「教导」,mā会无停「研究」,并且去考证所流传落来ê「格言」是m̄是真实。

第10节,chit节讲出一个好ê传道者,就是一个认真tī「走chhōe」真理ê人,而且是一个「忠实」、「真诚」ê人,ē-sái讲是本身是一个传道者siōng基本ê要件。

第11节,传道者mā是一位传讲「明智」信息ê人。因为án-ne,伊所传讲ê信息lóng有「督责ê功效」,ná亲像「顾羊人手中hit-ê带刺ê牧棍」仝款,表示伊诚心ê教导,mā会hō͘听tio̍h ê人感觉刺痛、艰苦心,m̄-koh这却对性命有启发作用。好koh认真正传道者会编撰教材,而且chiah-ê教材会影响深远。Bē因为社会环境变迁而改变,mā bē因为任何压力就改变本来ê教导。M̄-koh所有顶面所讲chiah-ê lóng是来自「人类ê大牧者上帝所赐ê」,换句话讲,真正智慧ê语言,m̄是人家己有ê,真正智慧结晶,是上帝赏赐hō͘人ê礼物。

第12节,tùi chit节到第14节,表示作者想beh chiah koh讲几句话,因为án-ne,伊用「iáu有一件事你应该tio̍h注意」。传道书作者表示天下有jōa大,就有jōa-chē ê册thang写。M̄-koh若想beh明日时头下事,he是无可能ê事。如果有人想beh án-ne做,最后只会hō͘伊感觉心神俱疲,结果mā是一场空虚而已。

第13节,传道者koh一pái tńg来到伊编撰此经册ê时ê中心思想,mā是伊siōng想讲ê话,伊讲:「Chiah-ê tāi-chì lóng 已经听了à;结尾就是tio̍h 敬畏上帝,谨慎遵守他ê 诫命;这就是人ê 本份。(全民版)」换句话讲,一个真实敬畏上帝ê人,会想tio̍h ê事,就是án怎实践上帝ê命令。

第14节,作者强调做一个人是m̄是有kā上帝ê命令落实在生活á是工作中,上帝会清楚知影。无论咱做甚么,「á是善á是恶,连hit-ê siōng隐秘ê事,上帝lóng tio̍h审判」,chit句话mā thang参考希伯来书第四章13节;马太福音第十二章36到37节。表示无论是甚么人,lóng需要面对上帝ê审判,无任何人ē-tàng例外。人若存 chit种认知,就会谨慎生活,注意家己在世间所做ê事kah所讲ê话。

重新查询 专卷研经 传道书系列
错误回报,请联系