使徒行传 8章26节 到 8章40节   背景资料  上一笔  下一笔
Chit段经文是继续绍介腓利kā福音往外邦人传开ê一个具体例。Mā tùi chit段经文koh一pái看见作者路加所强调ê,福音事工m̄是óa靠人ê能力,却是上帝ê灵亲自在作工。

第26到33节,chit段经文讲tio̍h上帝ê使者hō͘腓利知影,怎样帮助一个衣索匹亚ê高级财务官员。衣索匹亚是设tīchit-má苏丹南部境内ê部落,是乌人族群。Chit位官员mā加入了犹太宗教,因为án-ne,beh上耶路撒冷去朝圣,tī车顶读以赛亚书。因为án-ne,圣神引chhōa腓利去见伊,主要是beh帮助伊koh khah明白福音ê信息。果然,腓利照圣神ê指示tú-tio̍h chit位衣索匹亚官员,这官员表示家己并bē明白所读ê chit段以赛亚书第五十三章7到8节经文ê意思。

第34到38节,腓利因为有圣神充满,就真清楚kah chit位高级官员「讲解关系耶稣ê福音ê事」,以及受圣神感动,hō͘官员请求腓利为伊行洗礼。就án-ne,伊成做第一位受洗归属基督ê外邦人。作者路加有意表示:后来衣索匹亚ê福音事工ē-tàng建立起来,必定kah chit位官员有密切关系。Tùi chia mā看tio̍h早期教会传福音ê具体型态:用洗礼来表明chit-ê人已经领受了基督ê记号。

第39节,thang了解腓利是受tio̍h圣神带领去帮助chit位衣索匹亚官员认bat福音ê信息。Á当腓利完成chit项工作了后,上帝ê灵就kā腓利带离开现场,chit对此官员来讲,有强化信仰、坚定信心ê作用。

第40节,腓利是一个真有传福音恩赐ê人,tī使徒行传第廿一章8到16节有记载,腓利m̄-nā家己认真传福音,伊有四个cha-bó͘-kiáⁿ「lóng有传讲起帝信息ê恩赐」。

重新查询 专卷研经 使徒行传系列
错误回报,请联系