第10到21节，chit段是使徒保罗ê答辩。Tī chit段答辩词中，伊强调ê几点：（1）无任何举动有污辱圣殿ê事实，这是ē-tàng查证ê （第11到13节）。（2）ǹg望死人koh活，mā传chit种信息（第14到15、21节）。（3）应该hō͘ hiah-ê掠我、讲我污辱圣殿ê人出来当面指控（第19到20节）。（4）使徒保罗强调伊chit chōa tńg来耶路撒冷，是带tio̍h外邦教会信徒为赈济耶路撒冷贫困信徒ê奉献tńg去（第17节）。伊hō͘ chiah-ê犹太人领袖kah罗马总督腓力斯知影，伊m̄-nā m̄是危险份子，却是爱同胞ê人。

第22到23节，chia讲出真重要讯息，就是总督腓力斯mā知影耶稣koh活ê信息，这表示tī罗马帝国境内，已经有人kā耶稣koh活ê信息广传开来，而罗马政府已经知影chit件事。总督腓力斯显然对基督教ê信仰心存好感，因为án-ne，ài属下宽待使徒保罗，hō͘ in保护，并供应伊ê生活需要。