Chit章ē-sái讲是教会历史上真重要ê文献，记载耶路撒冷第一pái使徒会议，讨论外邦人加入基督徒团契，是m̄是一定tio̍h遵守犹太人传统ê割礼，结论是m̄免。

「有kóa人tùi犹太来到安提阿」，chiah-ê人是保守ê犹太人基督徒，in可能原本是属tī犹太人法利赛派ê分子，非常坚持守割礼ê重要性。In去kā安提阿教会ê信徒讲，摩西律法所规定ê割礼，比任何条件lóng重要。Chit种讲法tī使徒保罗看起来，等于是kā耶稣ê救恩hō͘降低了重要性，in kā得救kah割礼划上等号。

第2节，为tio̍h án-ne iáu造成安提阿教会内部发生争执。就án-ne in决定差派「保罗、巴拿巴，kah当地教会ê几个人上耶路撒冷」，去向耶路撒冷教会ê「使徒kah众长老请示」。这mā说明耶路撒冷教会是教会权威ê中心教会。

第3节，chit节讲出chiah-ê代表沿路lóng kah其他教会信徒分享tī外面邦开拓福音事工ê成果。

第4到5节，当in来到耶路撒冷教会ê时，确实有受tio̍h好ê接待。M̄-koh法利赛派ê信徒却是强调「外邦人一定tio̍h接受割礼，mā一定tio̍h遵守摩西ê律法」。

第6节，chit pái ê会议是「经过长时间ê辩论」chiah做出结论。

第7到10节，chit段经文是彼得ê信仰告白。伊kā家己kah哥尼流相tú ê经历说明出来，因为án-ne，肯定上帝ê圣神mā会tī外邦人中间做工。伊chit段话应该对hit-pái ê会议决定有非常ê影响力chiah-tio̍h。

第11节，彼得真清楚讲，要求外邦人守割礼是「m̄-tio̍h ê」，伊强调得救是因为「藉tio̍h主耶稣ê恩典」。

第12节，并无详细说明巴拿巴kah使徒保罗讲kóa甚么见证，m̄-koh「大家恬恬听」in两人tī外面邦地区传福音kah「所行ê一切神迹奇事」。

第13到21节，chit段经文是耶稣ê兄弟雅各做出结论，可见伊当时已经是耶路撒冷教会ê领袖之一。如果koh再比较加拉太书第二章12到13节，就会发见雅各已经tī耶路撒冷教会得tio̍h非常重要ê地位，连彼得kah巴拿巴lóng对伊让步。

由雅各做出chit pái议会ê结论：
(1)Bē-sái食祭过偶像ê食物。
(2)Bē-tàng有淫乱ê行为。
(3)Bē-sái食勒死ê cheng-seⁿ kah血。