Chit章mā是基督教会历史上真重要ê文献。本章提起两件非常重要ê事，一是关系彼得tio̍h哥尼流家去传福音，并为in-tau里所有ê人行洗礼，结果引起了耶路撒冷信徒ê议论，虽然讲chit件事真紧to̍h平息了，其实只是无浮出台面而已，等到使徒保罗后来tī外面邦地区传福音，这问题koh一pái引爆起来。二是chit章mā提供了真重要ê历史资料，就是巴拿巴去大数chhōe扫罗来安提阿教会传福音，mā帮助安提阿教会成长，而且后来成做外邦地区福音事工ê中心。

彼得tī该撒利亚哥尼流厝里所做ê事，一定是真轰动，chiah会有人真紧kā消息传tńg来到耶路撒冷教会。

第2到4节，「主张外邦人mā一定tio̍h领受割礼」，chit种看法ê人显然是kā割礼看做远比耶稣ê救恩koh khah重要。因为án-ne，in责怪彼得m̄-nā是去未受割礼ê外邦别人里「做客」，iáu kah in「同齐食饭」，tī chiah-ê人ê心中，in认为彼得先kā家己污秽、无清气了，怎样ē-tàng继续传福音ê工作。因为án-ne，逼kah彼得一定tio̍h kā「kui个tāi-chì ê经过一一向in解释」。
第5到17节，chit段经文ē-sái讲是第十章1到33节ê浓缩。彼得强调所有ê行动，lóng是tùi上帝来圣神ê启示，m̄是伊家己做主。伊特别强调上帝hō͘伊ê启示，是只要上帝看做洁净ê，人就无法度看做无清气。Koh讲，彼得举证，伊m̄是家己一个人去，却是iáu有约帕教会六个信徒陪伴伊同行，hiah-ê人lóng thang见证tī哥尼流厝里发生ê美好成果。

第16节，彼得引用耶稣教导所讲过，行洗礼约翰是用水行洗礼，m̄-koh耶稣讲in后来ê行洗礼kā带有圣神ê恩赐。因为án-ne，彼得tī chia beh表达tī哥尼流厝里所行ê洗礼，并m̄是伊个人，却是圣神亲自在行洗礼。

第17节，彼得强调「上帝kā这恩赐mā赐hō͘ chiah-ê外邦人」，chit句话已经讲出上帝拯救ê恩典，并m̄是只有停留tī犹太人中间。而且上帝拯救ê恩典，bē被割礼所限制。因为án-ne，伊讲：「我是甚么人，ē-tàng阻挡上帝ê工作mah？」

第18节，原本用真强烈语气质问彼得ê人，「就无koh批评」，而且lóng颂赞上帝救赎ê恩典，因为上帝kā「悔改而得性命ê机会mā赐hō͘外邦人了」。Chia看tio̍h「悔改而得性命」，这是作者路加beh表达ê信仰中心。