这是约翰所写ê第三封phoe，chit张phoe kah第二封phoe比较无仝款ê所在，就是写明了收phoe者ê名叫该犹，伊应该是作者ê好朋友。其它方面，第二书信kah第三封phoe lóng真相近，写phoe ê人lóng自称做「长老」，并且tī第9节指出伊bat写一封phoe hō͘教会，ē-sái讲是并无得tio̍h回应。Mā因为án-ne，作者继续写这第三封phoe。

	Chit张phoe非常简短，总共只有十五节，计二百二十个字。因为第二封phoe是写hō͘教会，m̄-koh用「女性」来称呼，就án-ne有人认为第二封phoe是写hō͘姊妹，而chit张phoe是hō͘一位兄弟读ê。仝款ê，第三封phoe虽然收phoe者是一位兄弟，m̄-koh伊所代表ê mā是一间教会，作者mā是希望chit张phoe ē-tàng公开传阅，hō͘ koh khah chē ê人知影。因为phoe内所谈ê，是kah教会信仰秩序有密切关系，而这就m̄是个人问题而已，是kah全教会ê秩序有关系。

Chit张phoe mā是讲tio̍h有人tī教会里传讲异端ê信息，而且已经影响tio̍h教会信仰秩序，因为án-ne，作者写chit张phoe hō͘该犹，肯定伊tī持守真理之道ê用心，mā同时tī phoe中严词谴责狄特腓chit-ê人，讲伊破坏教会秩序。Tī phoe中公开chit种人ê名清楚表示chit-ê人已经严重搅乱了教会应有ê秩序，为教会带来真大ê纷争、困扰。因为án-ne作者写chit张phoe是希望大家注意防范。Koh讲，因为收phoe人该犹是当时教会ê领袖，hō͘伊清楚问题ê所在，同时鼓励伊会koh khah积极整理教会信仰ê秩序。

第1节，作者表示家己是「长老」，m̄-koh并无署名是甚么人。这「长老」一词是犹太人表示长辈、领袖ê意思。Tī希腊文化通常会用「监督」，表示tī一个机构中ê行政首长。Chia真清楚写出chit张phoe是写hō͘「该犹」ê。
该犹，chit-ê名tī新约中出现kúi-nā pái，是罗马人不时使用ê名。真oh确定到底是toh一位，m̄-koh知影伊一定是当时教会中lóng受尊敬ê一位信徒，mā是教会中ê领袖。

「亲爱ê」、「诚心所疼ê朋友」，chia连续两pái所用ê「爱」字，lóng是用希腊文ê「爱」字（agape），表示作者对该犹 ê疼，是真实、无私、奉献ê疼。Mā thang tùi chia看出伊kah该犹之间亲密ê关系。

第2节，作者tī踏话头ê请安中，mā带入了祝福ê话语。非常有意思ê，就是作者除了祝福该犹「事事顺利」之外，mā祝福伊身躯健康，而且是kah「灵性健全仝款」。Chit种祝福已经teh表示该犹确实在信仰上有真美好ê见证。

第3节，chia开始讲tio̍h「真理」chit-ê词，作者tī短短ê只有十五节经文中，共计提起有五次之多。作者提起伊听tio̍h该犹「对真理忠诚，一向以真理为生活ê中心」，tùi chit句话thang明白该犹确实在信仰有真好ê见证，因为án-ne，tī第2节作者讲伊是一个「灵性健全」ê人。

「对真理忠诚」，chit句话thang参考约翰一书第五章6节所提起ê「圣神就是真理」。约翰三书ê作者beh表明ê点：公开承认耶稣基督降生tī chit世界上ê人，就是有「真理ê灵」tī伊性命里ê人。Á chit种观点mā出现tī约翰一书第四章2到3节。该犹就是一个有真实圣神同在ê人，伊就是teh见证耶稣基督确实降生tī这世间ê信息，无偏离基督ê要理。

Koh讲，作者讲该犹是「以真理为生活中心」，chit句话真清楚说明该犹 m̄-nā维持了信仰原则，而且koh kā信仰用tī生活上，这是讲伊是kā「彼此相疼」ê教示运用tī生活中，而伊chit种推动「彼此相疼」ê行动mā hō͘真chē人感受tio̍h「被爱」ê温暖，因为án-ne，chiah有人kā伊chit种见证传hō͘作者知影。

第4节，thang看出chit位「长老」作者是kā该犹当做ná亲像家己ê「kiáⁿ」一般看待。Chit种写法主要teh表达写phoe者kah收phoe者之间有非常亲密ê关系，而写phoe ê人ná亲像是老父仝款ê长辈，而收phoe ê人就ná亲像kiáⁿ一般是晚辈。Tī看tio̍h家己ê kiáⁿ m̄-nā遵守信仰ê规矩，而且iáu会用信仰规矩来生活，任何当老父ê，一定会感觉非常ê「快乐」。
第5节，作者o-ló该犹对所有ê信徒lóng是用仝款「真诚」ê态度对待，无分别。原因是作者有认bat一阵福音ê伙伴，路经该犹所属ê教会受tio̍h真好ê款待，而chit群人就是chia所讲ê「生份人」，in是一阵真正四界去传福音ê使者，已经去过该犹所属ê教会，而且带tńg来对该犹真好ê评语hō͘作者。

第6节，作者写这信ê原因，就是chit-má chit群传福音ê工作者又ài koh一pái经过该犹 ê地区，作者请in kā信带去hō͘该犹，除了鼓励该犹之外，mā同时请求该犹尽力协助in tī传福音ê补给上hō͘ in必要ê协助。
第7到8节，ná亲像头前已经叙述过ê，早期教会传福音ê特色，教会m̄是只顾家己，却是知影怎样协助hiah-ê tī各地传福音ê工作者，因为支助in，就等于是tī参与chiah-ê「为真理工作」作见证者ê行列。

Chia提起「不接受非信徒ê帮助」，因为非信徒并m̄-bat福音，in提供财物并m̄是为tio̍h见证福音。这mā说明m̄是只要有人捐款协助教会就好，应该tio̍h明辨捐助者是为tio̍h甚么，á是讲想beh tùi帮助中得tio̍h甚么。

	第9节，chia提起「想作领袖ê狄特腓」chit-ê人。Chit-ê人到底是甚么人？圣经并无hō͘咱koh khah chē ê资料，只知影伊是tī教会中扮演真重要ê角色（领袖）。

    第10节，作者tī chit节中指出狄特腓几点恶质ê行为，包括：
一是「m̄-chhap」作者写hō͘伊ê信。chit-má已经无法度查到作者chìn前写过ê phoe内容为何，有可能就是beh请求协助接待kah支持传福音ê同工。另外，作者指出狄特腓所犯ê过错。

二是狄特腓故意「造谣」生非，「毁谤」作者传福音ê工作。Chia ê「毁谤」，就是讲不诚实ê话，故意伤害别人。

三是siōng恶质ê行为，家己拒绝「接待外来ê信徒」无啥要紧，连想beh「愿意接待」好参与福音事工ê人，mā kā伊威胁beh「赶出教会」。
	作者tī chia明白写出chit位狄特腓ê问题，thang看tio̍h chit-ê人其实就是控制了教会，ná亲像是kā教会当做个人私有ê财产仝款，对教会ê存在kah发展来讲并无健康。

第11节，作者会tī chit封书信中特别提起狄特腓，伊劝勉该犹「m̄-thang学」狄特腓ê「pháiⁿ」款式，并提醒该犹「tio̍h学好」，这ê「好」是teh指「爱」讲ê，意思就是beh用疼来赢过hiah-ê做pháiⁿ事ê人，án-ne chiah ē-tàng看出基督徒kah非基督徒tī信仰上ê差别所在。因为只有「好行为」chiah ē-tàng见证上帝ê慈爱。

第12节，chit节提起另外一个人，就是「底米特」。Chit-ê人是甚么人？并无详细ê资料thang佐证。虽然有ê学者认为tī使徒行传第十九章24到27节提起有一个名叫「底米特」ê银匠，á是tī歌罗西书第四章14节提起使徒保罗之传福音伙伴「底马」可能就是「底米特」，m̄-koh资料lóng m̄齐全。M̄-koh chia讲「底米特」确实是tī福音事工上有美好ê见证，tú好kah头前提起ê狄特腓颠倒。

第13到14节，chit段结尾ná亲像第二封phoe仝款，作者lóng讲想beh「当面」kah该犹见面，因为「iáu有真chē话」想kah伊恳谈。Chit张phoe表示作者可能真紧会去chhōe该犹。

第15节，「愿你平安」，这是作者直接对信徒该犹 ê祝福。Tùi chit节mā thang看出作者kah该犹 ê教会之信徒真熟，chiah会ài该犹替伊向所有ê信徒「一一请安」。