Chit章使徒保罗ài帖撒罗尼迦教会信徒为伊kah其他同工代祷。Koh讲，使徒保罗mā劝勉帖撒罗尼迦教会ê信徒ài认真工作，thang做美好ê见证。

第1到2节，使徒保罗请帖撒罗尼迦ê信徒为伊kah其他同工tī传福音ê事工上代祷，thang hō͘福音ê信息ē-tàng真紧传开来。伊特别提起祈祷中记念in，thang「脱离邪恶ê人」，这是teh指hiah-ê专门teh扯使徒保罗后腿ê犹太人，时常tī使徒保罗传福音ê所在，煽动当地ê人民起来反对使徒保罗，hō͘伊kah众同工tī传福音ê事工上倍加辛苦。「并m̄是人人lóng信tùi主」，chit句话mā出现tī罗马书第十章16节。

第3到4节，chia讲「主是信实ê」，chit句话mā是kui本圣经teh见证「上帝是信实」ê信息。即使人m̄信，á是故意m̄-bat上帝，上帝iáu是信实（参考罗马书三：2—3）。上帝ê「信实」指ê就是他永远bē变ê疼。他已经应允ê事，必定会照应允实现，即使人改变了心意，上帝iáu是仝款不减轻对人ê疼（参考申命记七：9，诗篇一○○：5，哥林多前书一：9）。

第5节，伊mā祝福帖撒罗尼迦教会ê信徒，tī信心kah耐心上koh khah成长，体验koh khah深切。

第6到10节，chit段经文清楚指出帖撒罗尼迦教会ê问题，就是tī信徒中间有人只知影讲东讲西，kui工游手好闲，不作工，却想beh kah别人分享辛苦工作所得tio̍h ê食物。使徒保罗对基督徒ê生活态度要求真顶真，ná亲像伊tī罗马书第十二章1到2节所讲ê，beh成做圣洁ê人，像活活ê祭品，kah一般人有无仝等等，chiah-ê lóng是伊对信徒ê要求。Tī伊ê观念里，基督徒应该有koh khah高ê标准过世间ê生活。伊ài chiah-ê闲闲无tāi-chì ê人，向伊kah其他同工学习，因为in tī帖撒罗尼迦ê时，mā是「辛苦劳碌，日夜工作」饲家己，然后koh利用时间认真传福音，in留落来chit-ê hō͘该教会信徒thang做学习ê模样。

「m̄做工ê人bē-tàng食饭」，这是一句犹太人ê俚语。主要是根据创世记第三章17到19节，上帝对人ê要求，ài人辛劳工作，而且汗流满面chiah食得饱。真可能帖撒罗尼迦教会已经学习耶路撒冷教会「爱筵」ê聚会，有kóa人就利用chit种机会，专门享受食饭，而另外一方面却bih tī背后讲kóa对信仰无造就ê话。

第11到15节，使徒保罗劝勉chiah-ê终日无所事事ê会友，tio̍h亲手做工来维持生活ê需要，而且bē-tàng tī教会中乱放话，用现代ê语言表达就是「八卦」，伊ài chit种人安静落来。如果chit种苦劝iáu是m̄听，伊主张siōng好ê方式就是kā伊区隔出来，mài kah伊做伙，主要是为tio̍h hō͘ chiah-ê人「感觉惭愧」，希望用chit种方式ē-tàng达tio̍h类似惩罚ê效果，hō͘ chit种游手好闲ê人知所警惕并改过。

第16到18节，chit段经文mā是使徒保罗书信ê特色，除了祝福信徒外，mā表示chit封书信是伊亲笔所写ê。M̄-koh有可能是由别人代笔，然后由伊亲自签名。

「保罗祝lín好」chit句话thang看哥林多前书第十六章21节、歌罗西书第四章18节，lóng仝款ê写法。