Chit段经文讲述亚们继位了后，继续仿效in父亲玛拿西ê恶质ê行为。伊统治ê时间真短，大约只有两年左右。

第19到22节，ná亲像列王记作者所描述一个君王好kah pháiⁿ ê句型仝款；列王记作者认为好ê君王，就是仿效大卫王ê样式，尊崇上帝为大；相对ê，无好ê君王，就是带领人民去拜偶像。玛拿西就是非常恶质ê君王，伊甚至kā偶像神明带入圣殿内，误导犹大人民认为敬拜至koân ê万物之主上帝，kah拜偶像神明巴力kah亚舍拉仝款。Á继位玛拿西王位ê亚们mā是án-ne，学习in父亲玛拿西ê样式，当然就bē去「遵从上主ê诫命」。

第23到26节，chia提起有关宫廷政变失败ê事件，原因是亚们执政后，真紧就引起伊ê臣仆「反叛伊」，tī王宫内kā伊刺杀死。M̄-koh chiah-ê杀手并无因为án-ne而夺到王位，犹大人民反tńg kā chiah-ê谋害者刣死，然后立亚们ê kiáⁿ约西亚继位为王。chit-ê约西亚ē-sái讲是犹大末期siōng优秀ê一位君王。可惜ê是，伊ê改革mā无达tio̍h预期ê效果。