列王纪下 19章8节 到 19章19节   背景资料  上一笔  下一笔
Chit段经文继续讲述亚述皇帝西拿基立并无听tio̍h埃及tī伊背后进攻而惊惶,却是koh一pái用强猛、威胁ê动作,ài犹大赶紧向伊投降。希西家王接tio̍h西拿基立ê恐吓信了后,就去圣殿向上帝哭诉,请求上帝仲裁。

Chit段经文mā同时记载tī以赛亚书第三十七章8到20节。内容kah列王记作者所记载ê仝款。

第8节,chit节提起亚述皇帝西拿基立tī iáu未听tio̍h伊ê大将回报犹大王希西家并无降服ê意思,就已经先出兵去攻打犹大ê立拿城,chit-ê城mā是耶路撒冷重要ê卫星城市。此城ê沦陷,mā是teh说明耶路撒冷面临了严酷ê考验。

第9到13节,chit段经文讲出西拿基立可能有两pái攻打耶路撒冷。第一pái是tī第9节所提起ê,听tio̍h埃及出兵攻打亚述ê事,这mā是teh回应第7节所提起ê,上帝beh hō͘西拿基立听tio̍h谣言而撤军。M̄-koh当伊率兵tńg去防守ê时,埃及koh撤军tńg去。就án-ne西拿基立koh-khah受气,认为犹大认为有埃及当靠山,不降服,就án-ne koh一pái出重兵攻打耶路撒冷。伊chit pái先写一封phoe严厉警告犹大希西家王,hō͘伊知影亚述ê先祖已经攻占了几个城镇,chit-má伊mā攻占了六个城镇,伊写chit张phoe ê用意,就是beh希西家王目睭睁亮些,抵抗伊ê结果是koh khah悲惨。

第14到19节,希西家王接tio̍h亚述皇帝西拿基立ê恐吓信了后,感觉非常惶恐,只好kā chit封西拿基立写ê信摊tī上帝面前。伊向上帝哭诉,hiah-ê被毁灭ê城镇,lóng是因为人民无敬拜真正创造主上帝,却是去拜偶像ê结果。M̄-koh伊带领犹大人民敬拜上帝,因为án-ne,伊恳求创造万物ê主宰,mā是惟一ê真神一定会「tùi亚述手中」拯救in,án-ne就ē-tàng hō͘全世界ê人lóng知影独独chit位创造主chiah是上帝。

重新查询 专卷研经 列王纪下系列
错误回报,请联系