列王纪下 18章1节 到 18章12节   背景资料  上一笔  下一笔
Tùi第十八章开始,直到第二十章止,这三章lóng是teh绍介犹大希西家执政廿九年ê情景。Chit时期mā是南国犹大国siōng脆弱ê时chūn,m̄-koh却因为伊听从先知以赛亚ê建议,m̄-nā从事宗教信仰改革,带领犹大人民归向上帝,koh tī治国ê工作上,ná亲像列王记作者tī chia所讲ê:伊对上帝ê忠实,从来无一个王像伊án-ne,非常谨守上帝hō͘摩西ê律法诫命。

仝款ê记事,mā记载tī历代志下第廿九章,kā历代志ê资料用来对照列王记ê chit段记事,就会koh khah清楚希西家王ê治国情景。

Chit段经文非常特别,就是用第1到8节绍介南国犹大新王亚哈斯ê kiáⁿ希西家继任王位后ê大略记事,主要teh说明伊「效法伊先祖大卫王ê模样,做上主认为对ê事」,然续后落来用第9到11节对照北国以色列tī何细亚王治理之下,被亚述帝国灭亡,人民hông掠去做奴隶ê原因,就是「因为以色列人无听从上主—in ê上帝,违背上主kah in所立ê约」。Chit种对hip相当鲜明,teh说明一个国家、民族ê兴衰,就是根据in有无遵行上帝ê话语。Chit点mā是申命记派作者一贯ê思想kah信念中心。

第1到3节,chit三节真简单地绍介希西家王ê背景,以及伊「二十五岁」开始执政,统治「二十九年」,án-ne算来伊活了五十四岁。第3节讲伊「做上主认为对ê事」,chit句话表明伊ê风格kah信仰态度,kah伊ê老父亚哈斯ē-sái讲是完全颠倒(参考十六:3—4)。对照历代志下第廿九章3到11节所记载ê,就thang发见伊做王ê hit年,就重新kā圣殿ê门phah开,而且进行修建ê工作。伊ài众祭司kā圣殿内hiah-ê邪恶ê偶像全部清除。

第4到6节,列王记作者tī chit三节中hō͘ in希西家真好ê评价,讲:「希西家信靠上主—以色列ê上帝;犹大国,tī伊以前kah以后,无一个王kah伊仝款。」原因是伊继位ê时,beh kā伊ê老父所铸造大量偶像神明ê犹大社会环境改造,确实是需要一下苦心。Koh讲,第4节提供了真重要ê资料,讲伊mā phah破了tùi摩西时代传承落来ê「铜蛇」偶像ê崇拜(参考民数记廿一:4—9)。当年摩西铸造chit座铜蛇,有一个重要ê用意,是beh治疗in tī旷野漂流期间,bat因被蛇咬伤,有bē少人因为án-ne死去。铸造chit座铜蛇,是beh hō͘以色列人民看见了后,无koh惊惶。结果日子久了,以色列人民却kā它当做神像而kā它崇拜,直到chit-má希西家执政,chiah kā它摧毁。
Ná亲像前段所提起ê,当众祭司洁净圣殿了后,希西家王重新举办献祭礼仪作圣殿奉献(参考历代志下廿九:18—25)。Ē-tàng看出一个君王ê态度绝对会影响tio̍h人民。

第7到8节,因为希西家王对上帝忠实,「因为án-ne上主kah伊同在;伊所做ê一切事lóng顺利」,这mā是约瑟tī受卖到埃及做奴隶,以及后来被陷害而关入监狱ê时,作者一再用ê一句话(参考创世记三十九:2、3、21、23)。Tī chia,列王记作者讲上帝kah希西家王同在,hō͘伊有能力thang反抗亚述帝国,而且ē-tàng phah败非利士人,chiah-ê资料thang tùi历代志下第廿八章16到21节ê经文记事看tio̍h背景。说明tī伊执政之下ê南国犹大,国势渐渐茁壮起来。

第9到12节,ná亲像头前有提起过ê,chit段经文tī第十七章已经有真清楚描述亚述帝国消灭北国以色列ê经过,chit-má chia重新简略地叙述北国以色列灭亡ê记事,其实是有一个用意,就是tī第12节所beh说明ê,希西家王就是遵守上帝ê话,因为án-ne会tùi上帝得tio̍h气力。相对ê,北国以色列ê末代国王何细亚因为m̄遵守kah上帝ê约,带领人民弃sak上帝,无上帝同在,国家就因为án-ne被消灭à。

重新查询 专卷研经 列王纪下系列
错误回报,请联系