列王纪下 13章14节 到 13章25节   背景资料  上一笔  下一笔
这是旧约圣经记载有关以利沙最后一段ê经文。有关以利沙死后ê骨骸有特殊能力,是teh说明伊虽然无亲像伊ê老师先知以利亚仝款肉体升天,m̄-koh,伊ê肉体虽然埋葬了,却iáu有「神力」出现,表示出先知kah上帝之间特殊ê关系。Chit段经文mā是成做后代朝圣者络绎不绝地去以利沙埋葬坟墓ê主要因素。

第14节,tùi第八章记载有关以利沙ê记事后,就无koh出现以利沙ê事迹,直到chia重新出现,mā说明tī以色列历史里先知运动中,以利沙ê影响力thang讲和先知以利亚并驾齐驱。Chia讲以利沙「患tio̍h绝症」,tī伊teh要临终chìn前,约华施去探望伊,并且teh哭teh-hoah:「我父ah,我父ah!以色列坚强ê保护者ah!」tùi chit句话mā thang看出约华施kah以利沙之间有真亲密ê关系。Mā同时讲出以利沙ê气力,chiah是真正保护北国以色列ê基础。因为tī伊身上真有上帝ê能力kah伊同在。而且chit种力量khah赢过军队。

第15到17节,tī伊临终chìn前,iáu继续对来探望伊ê以色列王约华施讲出预言。这方式是透过用弓箭射箭ê方式,hō͘约华施知影,伊ê军队thang赢过叙利亚人ê侵犯,并且thang tī亚弗攻打叙利亚人,直到kā in灭绝。

第18到19节,chit两节以利沙ài约华施用箭phah地上,m̄-koh因为约华施只有phah三pái,因为án-ne,以利沙mā hō͘约华施知影,伊原本只要phah五、六pái,就ē-tàng完全消灭叙利亚人ê,m̄-koh却因为约华施无全力以赴,结果只有ē-tàng phah败in,并无能力完全灭绝in。

第20到21节,chit两节真特别,mā ē-sái讲是旧约圣经中siōng特别ê所在,就是以利沙死去,被埋葬à。Ē-sái讲是当有人kā死去ê尸体hiat到以利沙ê坟墓中,触(tak)tio̍h到伊ê骸骨,结果却发生chit-ê触(tak)tio̍h,hō͘死去原本准备埋葬ê死人,却因为án-ne而koh活起来。Mā因为án-ne,后来伊埋葬ê坟墓反而成做以色列人民欢喜朝圣ê所在,可能是希望藉tio̍h去朝圣,hō͘家己ê身躯也ē-tàng得tio̍h神奇ê医pah。

第22到23节,当以色列王约哈斯执政时代,叙利亚王哈薛不时侵犯北国以色列,m̄-koh lóng因为上帝ê恩典,chiah hō͘北国以色列ē-tàng有能力抵挡叙利亚ê侵犯。列王记作者讲,这纯粹是上帝ê恩典,因为上帝无愿意看见家己ê选民被欺负、受苦,ná亲像他以前透过摩西带领受苦ê以色列人民脱离埃及ê管辖仝款。

第24到25节,chit两节应验ā第18到19节以利沙对约华施ê预言。

重新查询 专卷研经 列王纪下系列
错误回报,请联系