Chit章说明上帝有应允所罗门ê祈祷。上帝应允ê方式，就是用他荣耀ê光彩降临在圣殿中。Koh讲，上帝直接向所罗门显现，并且真清楚向伊表示想得tio̍h上帝ê垂怜kah赐福，siōng基本ê要件，就是以色列人民一定tio̍h严格遵守上帝ê命令律法。

Chit段经文是上帝回应所罗门祈祷，因为看见上帝ê荣耀降临在耶路撒冷圣殿，所罗门就án-ne献上数以万计ê牛kah羊，然后就tī长到七工ê节期中，tī圣殿举行歌颂o-ló上帝ê活动。

第1到2节，当所罗门祈祷后，上帝回应伊祈祷ê方式，就是tùi天顶降落火，kā祭坛顶所献ê烧化祭kah物件lóng烧掉，而且有上帝特别ê光辉充满tī kui个圣殿中，致使连祭司mā无法度睁眼正视，因为án-ne，无法度进入圣殿里。

第3到6节，在场ê以色列人民lóng看见这景象，因为án-ne就谦卑坦覆 (thán-phak）tī土脚颂赞上帝。Á所罗门kah以色列人民koh一pái奉献koh-khah chē，包括有「两万两千头牛kah十二万只羊」，这确实是一个无法度想像得出来ê祭品，必定堆积得如一座小山仝款。Koh讲，奉献礼另外一个特色就是tī第6节所记载ê，in用诗歌o-ló，mā用乐器吹号。这m̄-nā说明献祭礼仪ê重要内涵，mā凸显利未人tī kui个礼仪中ê角色是真重要ê。

第7到10节，因为奉献圣殿是tī Tòa棚节，chit-ê节日长到七工，因为án-ne，这七工中间每工lóng有献祭ê礼仪，mā利用ná七工，in kah来自各地ê同胞同齐庆祝圣殿ê完成kah上帝ê降临，并感谢上帝赐福hō͘大卫延续到伊ê kiáⁿ所罗门。

其实，这七工ê欢喜庆祝有ê宴席，mā是teh暗示圣殿ê落成奉献，ná亲像举办婚宴仝款。以色列人民ê婚宴通常lóng是七工之久，in用chit种方式teh表明：上帝kah以色列人民之间ê关系ná亲像新婚ê夫妻仝款。