第廿三到廿四chit两章虽讲犹大王约阿施ê事迹，其实主要是teh绍介祭司耶何耶大án怎辅佐约阿施，以及进行宗教改革ê成果。Chit两章thang分做三个段落来看，一是耶何耶大膏立约阿施登基做王（第廿三章），大约是tī主前835到796年。二是耶何耶大kah约阿施合作施政、进行宗教改革ê时期（第廿四章1到16节）。三是约阿施家己施政ê时期（第廿四章17到27节）。

第廿三章对照列王记下第十一章来看，就ē-tàng发见siōng大ê无仝是：列王记ê作者并无说明圣殿警卫lóng是出tī「祭司kah利未人」，m̄-koh tī历代志则认为这是siōng重要ê事，mā tùi chia谈及宗教改革运动立足点，就是先洁净圣殿ê规矩，并且tùi chia强化祭司kah利未人所扮演ê角色。

Chit段经文主要是说明大祭司耶何耶大án怎帮助约阿施继承犹大ê王位，并且设法kā窜位ê王太后亚伊利雅除掉。Hō͘犹大国ê统治系统koh一pái tńg来复由犹大家族执政。

第1到2节，前章第12节讲耶何耶大将亚哈谢ê一个稚儿约阿施藏kah伊ê奶妈藏tī圣殿里长到六年时间。chit-má「到à第七年」，大祭司耶何耶大就串连五个犹大长官，行遍犹大各城镇，召集了所有ê利未人kah各宗族代表到耶路撒冷来聚集。

第3到7节，chit段经文是大祭司耶何耶大将约阿施公开绍介hō͘所有chiah-ê犹大国各宗族ê领袖，以及利未人。Ài in利用圣殿来保护约阿施，而圣殿就由祭司kah利未人kā关，除了chit两种人，lóng m̄准任何人进入，而且下令tio̍h利未人带防卫武器kā守。想beh闯入圣殿者一律格刣勿论。大祭司耶何耶大chit种态度已经真清楚，表明就是准备ài反叛窜位ê亚伊利雅女王。这mā说明祭司参与政变ê角色，mā hō͘「政教」关系显得koh khah亲密。不过Tī chit段政变ê过程中，mā重视了洁净圣殿ê重要性，因为有洁净圣殿ê举动，表示有进行宗教改革ê意思。

第8到11节，chit段经文真清楚讲出参与维护圣殿安全ê，m̄-nā是祭司、利未人而已，iáu包括民众mā在内，这mā说明大祭司耶何耶大所扮演ê角色，hō͘犹大民众lóng会顺服。就tī民众kah祭司、利未人严守圣殿ê时，大祭司耶何耶大公开宣布并kā王冠戴tī chit位尚为幼年ê约阿施头壳顶，chit时，民众大声hoah「愿王万岁」，就án-ne，约阿施正式继任为犹大王。

第12到13节，tòa tī王宫里ê亚伊利雅一听tio̍h耶路撒冷传出án-ne大ê欢呼声，赶紧走到群众聚集ê圣殿口一看，chiah发见原来是tī大祭司耶何耶大ê带领kah主持下，膏立约阿施为王。Chit时chūn ê亚伊利雅女王知影chit时mā是伊失去所有权势ê时刻，伊悲痛地拆裂衫裤来表示极大ê哀痛，并且大声hoah讲「造反了」。M̄-koh伊bē记得当年伊是残忍ê杀害kui个犹大家族而自任为王。

第14到15节，耶何耶大发见亚伊利雅，下令kā伊掠，并且带tńg来王宫kā伊处死。