第五、六两章，使徒保罗讲tio̍h众信徒应该用怎样ê态度，关心hit-ê些守寡ê妇人，以及正确ê教会生活态度。这thang看出使徒保罗对牧养教会ê事真有条理地指出本身是一个牧养者，tio̍h清楚教会ê问题所在，mā需要知影选举适当ê信徒成做教会干部，kah怎样hō͘ hiah-ê专门欺骗信徒ê假教师tī教会中无寄生ê空间。M̄-koh chiah-ê lóng一定tio̍h有一个基本要件，就是传道者知影进步，hō͘家己teh教导ê事顶面有美好见证，若无，就算无假教师tī教会传达错误ê信息，信徒ê信仰品质mā是bē提升。Á所有教导ê基础就是tī圣经。

第1节，使徒保罗讲过教会就是一个家庭，是属tī「上帝ê殿」（参考三：17），因为án-ne，家庭应该注重长幼有序。Chia ê「责备」，意思是teh指用严厉ê言语来谴责ê意思，这tī教会生活中并m̄是应该有ê态度。Á第二句ê「待少年人」是kah前一句ê「老年人」相对照。对少年人tio̍h ná亲像对待家己ê兄弟仝款，chit种讲法，基本上lóng是立足tī「家庭」ê环境中看待别人。因为教会ná亲像一个大家庭般，所有ê信徒lóng ná亲像兄弟姊妹仝款。

第2节，是kah第一节相对照；chit节讲tio̍h对待女性ê态度，特别是tī chia提醒提摩太tio̍h注意对待hiah-ê少年妇人，ài有「纯洁ê心」，这是teh指m̄-thang有「邪恶」ê念头，mā就是m̄-thang因为看tio̍h少年ê妇女，就想tio̍h奸淫ê事，这是真危险ê事，因为án-ne，用「纯洁ê心」对待少年妇女，是一门真重要ê功课。

第3节，tùi chit节直到第16节，lóng是提起有关寡妇ê问题。Chit节经文隐约thang看tio̍h初代教会信徒中间，已经有bē少寡妇tī其中，原因真可能kah初代教会中，大家以有物共享ê生活方式相聚会，而chiah-ê寡妇真可能是来自sàn-chhiah ê家庭。使徒保罗提起siōng重要ê一点，就是beh「尊敬真正teh守寡ê妇女」。「尊敬」chit-ê词，指ê m̄-nā是对寡妇tio̍h真心实意ê敬疼in，而且是beh用真实际ê行动帮助in ê生活需要。Koh讲，「真正teh守寡」，kah第6节提起ê「专想享乐ê寡妇」相对照；tī chia是teh指真正有规律生活ê寡妇。

第4节，身为儿孙ê，应该知影尽孝道。Thang理解寡妇若是无子女，生活会陷入困境，因为无法度继承财产。M̄-koh若是有子女，就ē-tàng kā丈夫留落来ê产业继承过来，án-ne，即使是守寡mā thang减少生活上ê困难。Chia提起身为寡妇ê kiáⁿ孙，应该对家己守寡ê祖母á是老母尽孝道。Chit种教示kah十诫中ê第五诫仝款，lóng是beh对父母尽孝道（参考出埃及记二十：12），这是基督教信仰siōng基本ê要求。

第5节，chia提起「真正teh守寡ê妇女无依无靠」，这表示chit种寡妇是无子女thang帮助，chit时，教会应该设法hō͘ in协助。

第6到7节，chit节所提起ê「专想享乐ê寡妇」，意思是表面上守寡，其实是过淫荡ê生活。使徒保罗讲对chit种寡妇，tio̍h无客气ê教导in，免得连带hō͘教会受tio̍h「指责」，对福音事工就会造成伤害。

第8节，教导信徒tio̍h照顾亲戚中chiah-ê贫困而且真守寡ê寡妇，á是已经年老无法度工作ê年长者。Thang án-ne了解：如果信徒连家己厝里ê亲人lóng m̄肯伸手帮助，却tio̍h教会来代劳，这并m̄是好见证（参考约翰一书四：20—21）。

第9到10节，chia提起教会tio̍h关心ê对象，就是已经年满「六十岁以上」，而且守寡了后，就m̄-bat koh再出嫁过ê。而且有好ê「声誉」，chit种寡妇tio̍h kā in全力看顾。其实，tī圣经时代，一个人beh活到六十岁以上并无容易。Á需要登记ê原因，是为tio̍h方便tī关怀ê事顶面，免得有遗漏ê tāi-chì发生。Koh讲，真可能是kah当时教会选举干部有关系，chit点thang tùi第10节ê「真gâu养育kiáⁿ」chit句话看出来，in不是beh hō͘人赈济，而是beh in来帮助别人，因为in过去就bat「扶难济急」过别人。造名册，mā是一种分工管理ê好方式，thang koh khah清楚信徒ê资料动态。Tī chia提起列名造册ê资格。

第11到12节，chit段经文是进一步teh解释为甚么需要年满六十岁chiah thang登录tī名册中，原因就是希望真正守寡ê妇女，受tio̍h尊敬，hō͘ in tī参与教会事工上，有美好ê见证。M̄-koh chit段经文mā hō͘咱看tio̍h二千年前时代ê婚姻观念。使徒保罗受过犹太经学教师训练，自然tek带有chiok厚ê犹太社会思想ê观念，chit种观念kah「约」ê认bat有密切关系。另外一方面，咱thang了解古代ê社会，cha-bó͘人外出工作ê机会真少，因为án-ne，sàn-chhiah寡妇若是想beh靠能力生活，确实真困难。Mā因为án-ne，不时有少年寡妇会为tio̍h生存而沦落为妓女，á是会想出所有ê办法赶紧koh再嫁别人。这mā是第11到12节所提起ê背景，讲chiah-ê少年ê寡妇想beh koh再嫁ê原因，其实并无一定是因为性欲冲动，á是违背当时ê誓约，却是当时ê社会确实hō͘少年ê寡妇生存无容易。

	第13节，chia所讲ê「浪费光阴」，指ê就是pîn-tōaⁿ，m̄做工ê意思。因为m̄做工，所以有真chē闲暇ê时间，chiah会四界去串门子讲别别人ê闲话。

	第14节，使徒保罗提出伊对少年寡妇koh再嫁ê看法。其实，伊并无反对少年寡妇koh再嫁，至少án-ne thang解决少年寡妇tī生活上tú-tio̍h ê问题。Koh讲，因为若ē-tàng生育子女，妇女就会无闲照顾养育子女，自然就无时间去串门子讲闲话à。

	第15节，chia讲tio̍h「有kóa寡妇改变初衷，跟tòe撒旦去了」，chia所讲ê「跟tòe撒旦」，意思是teh指有kóa寡妇犯第11 kah第13节所提起ê事，甚至可能暗地里kah cha-po͘人有偷情ê行为，hō͘人掠tio̍h把柄藉机亵渎教会信仰团契ê圣洁。

	第16节，chit节thang反应第4 kah第8节所讲ê，身为耶稣基督ê信徒，应该知影尽孝道ê重要，ná亲像咱tī头前已经讨论过ê，如果连家己ê亲人lóng无想hō͘ in帮助，就真oh进一步见证信仰团契tī耶稣基督ê疼里ê意义。

第17节，tùi chit节ē-tàng看出教会「领导ê长老」所承担工作ê内容，包括「讲道kah教导」。Mā tùi chia thang清楚看tio̍h chit种长总是专职ê，并m̄是兼差á是义务ê。因为就是专职ê，所以chiah需要教会照顾伊生活上ê需要。Chia使徒保罗所讲ê「酬报」，有一种看法认为这是teh指「物质上ê报酬」之外，iáu包含「尊敬」ê意思，因为án-ne，chiah讲是为「加倍ê酬报」。

Chit种看法就kah咱台湾长老教会对tī传道者领受ê薪资kā它称做「谢礼」仝款，却m̄是讲「薪资」á是「薪水」，原因是认为chit种传福音ê事工无仝tī一般工作。这是为tio̍h beh hō͘信徒对专心而且认真tī福音事工上ê传道者，hō͘ in siōng koân ê敬意。所谓「加倍」，这是有含希伯来语ê风味，意思是teh指「丰富」、「够额而且有chhun」。

第18节，「牛teh踏五谷ê时chūn，bē-tàng笼tòa它ê嘴」chit句话，是引用申命记第廿五章4节摩西律法ê规定。使徒保罗写phoe hō͘哥林多教会ê时，mā提起chit方面ê问题（参考哥林多前书九：3—18）。

第19节，「两个á是三个证人」，是引用申命记第十九章15节摩西律法ê规定：「一个证人无够额来定人ê罪；至少ài有两个以上ê证人才thang定人ê罪。」使徒保罗引用chit-ê律法规定，主要是维持教会秩序之需要，伊无希望教会chit种信仰团体轻易引起纠纷。

第20节，chit节是延续第19节，意思是用不实ê罪状指控传道者ê，应该被公开谴责，án-ne就ē-tàng减少不必要ê纠纷kah误会，致使教会ê秩序会失去根据。M̄-koh另外一方面，mā是teh指如果有传道者犯罪，就应该公开谴责，hō͘其他传道者知所警惕。

第21节，使徒保罗tī chia会提起了「天使」。犹太人一向有一个观念，认为天使是替上帝执行命令ê使者，像创世记第十九章ê天使，奉上帝差遣到所多玛城去执行毁灭ê工作。Koh亲像路加福音第一章提起天使奉上帝差遣，去向撒迦利亚传达行洗礼约翰teh beh出世ê信息，以及kā马利亚讲会因为圣神而有娠生落来耶稣基督。天使tī天顶mā是列位tī上帝审判ê边á，协助上帝执行审判ê工作（参考帖撒罗尼迦后书一：7）。因为án-ne，使徒保罗tī chia用「天使」，主要意思就是teh指控告传道者是一件真严肃ê事，而传道者犯罪mā是仝款，tī上帝国ê信息看起来，he是非常严重ê，因为传道者若犯罪，会比一般信徒犯罪hō͘福音信息受tio̍h亵渎ê情况koh khah严重。使徒保罗ài提摩太小心，m̄-thang有任何「成见á是偏私ê心」。因为提摩太尚且少年（参考四：12），有时会hō͘人认为伊少年m̄-bat事。

第22节，这是真重要ê一节，使徒保罗ài提摩太小心，m̄-thang「随便kā人行按手礼」。所谓「按手礼」，这是真严肃ê一个动作。Tī犹太人传统中，只有长辈对晚辈ê按手，表示祝福，而这祝福是用上帝ê名。如果随便hō͘人祝福，mā等于违反十诫ê第三诫所讲ê，乱使用上帝ê名仝款（参考出埃及记二十：7），真可能会陷入浮滥、不实ê结果，这等于是teh践踏上帝ê恩典仝款。

第23节，chit句话kah-ná kah前后文lóng对不起来。为甚么使徒保罗忽然对提摩太提出chit句话来？真oh理解。有可能是因为提摩太身躯状况欠佳，使徒保罗ê关心m̄-nā tī教会事工，mā tī伊ê生活需要。

第24到25节，chit两节是相对经文，犯罪kah善行是相对ê，m̄-koh lóng有一个共通点，就是无法度隐藏。无thang隐藏ê事，chit种劝世箴言tī各地lóng有。台湾俗语：「鸭蛋卡密，mā有缝。」中国俗语mā án-ne讲：「若beh人m̄知，除非己莫为。」这lóng仝款ê意思。使徒保罗ê这两句话，其实就是teh kā提摩太讲，m̄-thang急beh替一个人行「按手礼」，因为若有人讲某某人无好，除非所犯ê过错是非常明显ê，若无，有kóa事确实是tī现行时间内无法度查证出来，m̄-koh过一段时间，chiah-ê败坏ê行踏lóng会显露出来。仝款ê，mā可能有kóa人被o-ló讲真好，ē-sái讲是却看bē-tio̍h实际ê善行，m̄-koh经过一段时间，chiah会发见chit-ê人真正做真chē无为人知ê善事。