撒母耳记上 15章10节 到 15章35节   背景资料  上一笔  下一笔
Chit段经文真清楚讲出先知撒母耳明确指出扫罗ê问题所在,就是违背上帝ê旨意,这是上帝所无法度允准ê态度。因为设立君王制度,就是beh君王听从上帝ê旨意带领以色列子民,就亲像上帝所选派ê牧者仝款。若是无听从上帝ê命令,主人会随时更换chiah-ê被拣选出来ê领导者。因为án-ne,thang án-ne了解:听从上帝ê旨意,照上帝ê旨意去行,是kui本圣经ê教导。

第10到14节,先知撒母耳听tio̍h上帝无欢喜扫罗ê时,感觉非常懊恼、烦恼。Tī第11节ê chit句「撒母耳真无欢喜」,tī《中文和合本》用「撒母耳便甚忧愁」,《台语版》圣经用「撒母耳真戚心」,天主教《思高圣经学会晓版本》用「撒母耳感觉不安」。因为án-ne,chit句「撒母耳真无欢喜」,指ê是先知撒母耳对扫罗违背上帝ê行为感觉非常不悦ê意思。伊特别为tio̍h án-ne事整夜向上帝祈求,为tio̍h是beh希望上帝ē-tàng赦免扫罗,究竟扫罗是第一位hō͘伊膏立ê国王。M̄-koh扫罗显然m̄知上帝已经无欢喜伊违背命令,iáu teh「迦密」chit-ê地方「起造一座记念碑」,用来记念phah败亚玛力人。伊m̄是筑一座祭坛献祭hō͘上帝,以感谢上帝。却是建造一座记念碑,记念chit场战事。先知撒母耳为tio̍h chit件事特别去chhōe扫罗,伊对先知撒母耳表示家己已经有「遵守了伊ê命令」,m̄-koh先知撒母耳真质疑地讲:「是mah?」这是一句高度怀疑ê话。因为伊听见有cheng-seⁿ ê叫声。

第15节,chit节经文讲出扫罗所想ê,tú好违背上帝ê旨意。扫罗辩解说「留落来siōng好ê牛羊,为ê ài做牲祭献hō͘上主」,伊显然是想beh改变了上帝ê旨意。却m̄是完全顺从上帝ê旨意。Koh讲,伊无承认是家己下命令,beh kā chiah-ê动物cheng-seⁿ留落来,却是讲「我ê军队」,显然是teh推责任。

第16到19节,先知撒母耳听tio̍h扫罗án-ne解释了后,用真受气ê语气ài伊「恬去」,然后kā上帝启示伊ê话kā扫罗讲。Tī chit-ê信息中有几个重点:

一是扫罗ê王位是上帝所选立ê,并m̄是伊平白thang得tio̍h ê,á是伊有甚么thang被膏立为王ê条件。

二是上帝ê命令非常清楚,ài kā chit场战争当做一场「圣战」。Mā就是为上帝而战。

三是先知撒母耳清楚指出扫罗「仓仓pōng-pōng地掠夺战利品」,chit节讲出扫罗头前所讲「ài做牲祭献hō͘上帝」ê话,根本就是欺骗、不诚实ê推托之词。表面上看起来的确是用来献祭,m̄-koh建造记念碑荣耀家己,án-ne,teh献祭ê时,就真容易会家己扮演「神明」ê角色。这mā是chia所讲「做上主看做邪恶ê事」ê意思。

四是chit句「上主看做邪恶ê事」,tī旧约圣经中通常lóng是teh指敬拜偶像ê行为,á是严重违背上帝ê旨意。当做者用「上主看做邪恶ê事」,指ê就是chit位君王无专一ê心敬畏上帝。

第20到21节,扫罗听先知撒母耳ê话了后,伊koh一pái辩解说是伊ê军队无照命令做tāi-chì,换句话讲,伊并强调家己lóng照上帝ê命令做tāi-chì。

第22到23节,chit两节诗歌讲出kui本圣经ê中心信息,mā是扫罗故事ê中心。「顺从比祭物koh khah好;听命赢过献上siōng好ê羊」,chit句话thang参阅以赛亚书第一章11到17节;耶利米书第六章18到20节;何西阿书第六章6节;阿摩司书第五章21到24节;弥迦书第六章6到8节等等经文。先知ê文献lóng teh强调听从上帝ê话,遵行上帝ê旨意,远比献祭kah烧热烈ê敬拜礼仪koh khah重要。第23节ê「背叛」,等于是kah上帝对敌仝款,这是teh指违背上帝ê旨意,chit种行为就kah「行巫术」仝款严重。Chit种行为tī摩西律法中是严厉禁止ê(参考利未记十九:31,申命记十八:10—11)。Á「傲慢kah拜偶像仝款有罪」,这是因为傲慢ê人,心中根本to̍h无上帝(参考诗篇十四:1),会家己扮演上帝ê角色。

第24到26节,扫罗听tio̍h先知撒母耳chit种指责后,伊终其尾承认家己「犯罪了」,违背上帝ê命令kah先知撒母耳ê指示。伊koh khah坦承是因为惊人民chiah做出chit种决定。因为án-ne,伊ǹg望先知撒母耳陪伊tńg去吉甲。因为扫罗清楚知影,若是有先知撒母耳teh陪伴伊去吉甲,以色列人民对伊ê尊崇会加分;相对ê,若是人民发见先知撒母耳kah伊决裂了,一定会影响tio̍h伊tī以色列人民中间ê形象kah领袖权威。M̄-koh先知撒母耳tú开始拒绝chit项请求。并且明白hō͘伊知影上帝已经厌弃伊,boài伊koh再做以色列人民ê王。

第27到29节,当先知撒母耳决定离开扫罗ê时,伊赶紧giú-tiâu伊ê衫裤,无想tio̍h就án-ne衫裤「拆裂了」,这mā表示先知撒母耳kah扫罗之间ê关系决裂了,mā象徵tio̍h以色列王国kah扫罗ê关系有裂痕。第28节ê chit句「赐hō͘一个比你koh khah好ê人」,已经为后来大卫被膏立为王留落来一个伏笔。

「上帝不讲白贼,mā bē改变主意」,chit句话thang参考民数记第廿三章19节;诗篇第一一○篇4节;耶利米书第四章28节。所谓「bē改变主意」,是teh指上帝ê计划,必定会照时间完成。

第30到33节,扫罗koh一pái承认家己犯罪。M̄-koh伊请求先知撒母耳陪伊tńg去吉甲献祭敬拜上帝,thang hō͘人民看见伊kah先知撒母耳之间有和谐ê关系。先知撒母耳同意扫罗ê恳求,陪伊去吉甲祭坛献祭hō͘上帝。M̄-koh这并无表示伊同情扫罗,á是接受伊ê请求,却是如第32到33节所记载ê,先知撒母耳是beh去执行亚玛力王亚甲ê死刑。

第34到35节,先知撒母耳决定离开扫罗,而扫罗则清楚知影,无先知撒母耳ê支持,伊tī人民中间kā失去领导地位。Tī当时,虽然已经设立了君王制度,ē-sái讲是先知ê角色tī以色列人民中照常是siōng重要。一直到第十九章24节扫罗chiah koh一pái见tio̍h先知撒母耳。

重新查询 专卷研经 撒母耳记上系列
错误回报,请联系