Chit章主要是绍介先知米该雅ê事迹；另外，chit章mā teh描述北国以色列kah叙利亚之间ê战争。作者利用chiah-ni̍h长ê篇幅，teh说明北国以色列王亚哈，伊是jōa-ni̍h-á m̄遵守上帝ê旨意，甚至tī王宫内家己养了真chē听伊ê话ê先知，就是为tio̍h beh抵销上帝ê话，结果伊ê chiah-ê假先知m̄-nā无hō͘伊带来帮助，iáu因为án-ne hō͘伊遇tio̍h性命ê危险，最后终到死亡。

Chit章经文记事mā同时记载tī历代志下第十八章。

Chit段经文记载以色列亚哈王想beh出兵去攻打叙利亚，好kā祖先时代被叙利亚王占去ê城市—基列ê拉末—夺tńg来。Chit时tú好犹大王约沙法正到北国以色列访问，伊不得不表示mā愿意参与chit项出兵ê重大做tāi-chì。M̄-koh，伊建议chit种军事行动siōng好事先听听上帝ê旨意。亚哈想用家己所养ê先知来证明家己所做决定是正确，m̄-koh犹大约沙法王却无án-ne认为，却是主张应该听听上帝ê先知ê话chiah正确。亚哈王只好派人去带上帝ê先知米该雅来，请伊问问上帝ê旨意。 

第1到3节，若是照第二十章34节ê记载来看，显然地叙利亚王答应kā伊所侵占以色列ê土地，iáu有kóa无归iáu。虽然叙利亚已经kah以色列之间签订了两国和平条约，m̄-koh经过两年ê和平了后，以色列亚哈王利用tú好到北国访问ê犹大约沙法ê时，要求两国联盟出兵去攻打叙利亚，理由是希望ē-tàng夺tńg来基列ê拉末城。约沙法会去访问北国以色列，照历代志下第十八章1节ê记载，是因为两人结为亲家ê缘故。

基列ê拉末，这是设tī约旦河东岸，远tī摩西时代就属tī以色列人所有（列王记上四：13、申命记四：43），由迦得支族管辖。M̄-koh当时已经沦陷tī叙利亚人ê手中。

第4到6节，约沙法随时表示同意两国同盟出兵，m̄-koh要求一定tio̍h先问问上帝ê先知，thang知影上帝ê旨意。历代志作者讲，约沙法是一个敬畏上帝ê君王（参考历代志下十七：1—9）。亚哈王随时tùi王宫内召来「四百名先知」询问in ê意见，结果这四百名lóng顺tio̍h亚哈王ê意思，讲上帝一定会hō͘伊得tio̍h胜利凯旋tńg来。其实，这四百名先知lóng是亚哈ê御用先知，多会讲亚哈王欢喜听ê话而已，因为án-ne，mā thang称做假先知。因为真实ê先知，只有讲上帝beh伊讲ê话。

第7到9节，犹大王约沙法感觉无对tâng，伊要求应该听「上主ê先知」。Á亚哈讲chit位上主ê先知是「音拉ê kiáⁿ米该雅」，显然地，亚哈王清楚知影伊家己所养ê先知，kah上帝ê先知无相仝。因为米该雅bē听从伊，讲伊欢喜听ê话。亚哈王向约沙法表示，讲上帝ê先知米该雅常向伊讲「凶险ê话」，就是不吉利ê话，hō͘伊感觉讨厌。M̄-koh约沙法iáu是认为beh听上帝先知ê话，亚哈王不得已，只好同意，就派人去chhōe先知米该雅。