列王纪上 1章11节 到 1章37节   背景资料  上一笔  下一笔
Chit段经文描述先知拿单án怎策划反制亚多尼雅chit种排设祭祀礼仪kah筵席ê举动,mā thang看出先知tī大卫宫廷中扮演重要ê角色。

第11到14节,chia事(tāi)先提起「所罗门ê母亲拔示芭」,kah「哈甲ê kiáⁿ亚多尼雅」,chit种用句,已经teh隐喻宫廷ê内斗,是两个大卫ê细姨,开始为家己kiáⁿ争取王位继承权ê开始。先知拿单对亚多尼雅举办献祭kah排设筵席ê解释,认为he是一种「立家己做王」ê举动,已经危害到拔示芭kah所罗门ê性命安全。因为án-ne,伊建议拔示芭去见大卫王,到底大卫beh立甚么人做王,并且答应当证人,证实亚多尼雅自立为王ê事。

第15到16节,拔示芭chiâⁿ实听从先知拿单ê建议去见大卫王。

第17到19节,拔示芭提醒大卫bat chiù-chōa beh hō͘伊所生ê kiáⁿ所罗门继承王位,而chit件「chiù-chōa」ê事,iáu是先知拿单提醒伊去向大卫提起ê。表示用上帝ê名chiù ê chōa言之重要性,是无法度更改。M̄-koh拔示芭向大卫提起,伊bat答应hō͘伊ê kiáⁿ所罗门继承王位chit件事,圣经并无记载,真可能是大卫私相授受ê事。续落来伊提起亚多尼雅擅自宣布家己是王,而且有祭司亚比亚他kah元帅约押参与,其实,拔示芭án-ne讲,已经teh表明iáu未经过大卫宣布王位继承者chìn前,亚多尼雅chit种举动,等于kah押沙龙家己宣布为王ê举止仝款,这mā teh警告大卫tī晚年行动不便ê时,是m̄是会koh一pái tú-tio̍h宫廷篡位ê惨痛经历。

第20到21节,拔示芭真聪明,伊深知大卫就是杀害伊丈夫乌利亚而夺取伊为细姨,若无保护伊,伊会因chit pái亚多尼雅篡位ê事,kah kiáⁿ所罗门惨遭杀害。

第22到27节,先知拿单照chìn前设计好ê方式,就tī拔示芭进入宫廷面奏大卫关系亚多尼雅篡位ê事ê时,伊tòe后就跟tòe去见大卫,tòe后讲亚多尼雅ê举止,等于是见证了拔示芭所讲属实。拿单聪明ê所在,并m̄是只有讲亚多尼雅确实有án-ne做,却是质问大卫若是允准chit件事,怎样会无公开宣布。伊ê意思是hō͘大卫知影,chit件事若赶紧阻止是iáu会赴。Á拿单就是清楚知影大卫犯奸淫罪ê先知,而且约押又koh是大卫心中ê痛。因为án-ne,拔示芭kah先知拿单lóng特别指出约押参与chit pái亚多尼雅ê篡位行动,用chit种方式增加大卫ê无安全感。

第28到31节,大卫随时用上帝ê名chiù-chōa,beh hō͘所罗门继承伊ê王位。换句话,chìn前指出大卫已经发过ê誓言并无算数。Á这mā看出晚年ê大卫,神智并m̄是真清楚。

第32到35节,这是大卫王采取积极行动,mā是一种反制亚多尼雅想beh篡位ê计谋,这可能kah押沙龙带hō͘伊ê伤害经历有关。大卫ài伊忠心ê部属,包括先知拿单、祭司撒督、耶何耶大,以及军事第二号将领比拿雅等人, ài所罗门骑上大卫ê驴á,这真有象徵性ê意义,表示所罗门有继承王位ê资格,然后ài先知拿单kah祭司撒督膏立所罗门为以色列kah犹大ê王。膏立ê地点为甚么选tī基训水泉边,并无清楚,有可能是为tio̍h beh先行洁净礼,然后chiah举行膏立ê仪式。M̄-koh重要ê,是当完成chiah-ê礼仪了后,tńg来到耶路撒冷王宫,hō͘所罗门坐tī王座上,án-ne chiah表示所罗门已经继任为王。第35节讲所罗门是beh当「以色列kah犹大ê统治者」,这是因为第一任ê国王扫罗出tī北部便雅悯支族,而大卫则出tī南部犹大ê支族,因为án-ne,南北两大族群一直lóng心存芥蒂。

Tio̍h注意在第34、39节,lóng讲大卫ài祭司撒督kah先知拿单去膏立所罗门为王,却m̄是上帝亲自对先知á是祭司ê启示,却是出tī大卫ê指令。这kah大卫、扫罗lóng是上帝向先知撒母耳启示拣选、膏立出来ê,完全无仝。Mā tùi chia开始,以色列人民以后ê国王lóng是世袭,而非上帝向先知启示而膏立ê。这tī信仰上ê意义非常无仝款。

第36到37节,比拿雅听tio̍h大卫án-ne宣告了后,就表示全力支持所罗门继承王位。这真清楚说明大卫身边ê禁卫军拥护所罗门为王。

重新查询 专卷研经 列王纪上系列
错误回报,请联系