哥林多前书 9章1节 到 9章14节   背景资料  上一笔  下一笔
Chit-má使徒保罗开始讲tio̍h有关传道工作ê问题,chiah-ê kah-ná kah头前所谈ê问题lóng无关联,其实不然,因为tī第八章9到13节中,伊提起有关基督徒「自由」ê问题,特别是tùi食物ê问题看信仰生活中ê「自由」。自由应该kah责任相辅相成,有自由,就会有责任ê问题。Tī第八章里,伊一再强调基督徒ê自由一定tio̍h考虑tio̍h tī信仰上脆弱ê兄弟姊妹,m̄-thang因为家己tī信仰上ê认知比较周全,á是经历比较多,而伤害到hiah-ê信仰上tú起步,á是尚且在学习阶段ê人。

第九章是使徒保罗进一步以家己为例,teh解释「自由」ê问题。Tùi chit章thang清楚看tio̍h使徒保罗并无想beh替家己辩护甚么,伊只是想kā哥林多教会ê信徒讲:做一个基督徒,tī信仰里谈「自由」ê时,所beh付出ê代价远比一般人所要求ê水准koh khah高。如果无chit种信念kah认bat,谈信仰上ê「自由」是真空洞ê。Mā就是讲,一个人beh享受自由,就一定tio̍h为自由付上真chē代价。Koh khah重要ê是,「自由」siōng大ê特色是用「心甘情愿」为基础,所以谈信仰上ê「自由」,就无法度有心存骄傲ê态度,却是宁可屈就家己,kah卑微ê人做伙,这mā是耶稣ê教导(参考马可福音十:43—45)。

Chit段经文mā thang看出哥林多教会内部有人teh论到传福音者领受酬劳ê事。而且利用chit-ê机会tī背后议论讲使徒保罗可能因为m̄是真正使徒,所以m̄敢接受信徒beh hō͘伊ê酬劳。其实,tùi哥林多后书第十到十一这两章thang看出,哥林多教会中出现假先知,á是假使徒teh欺骗信徒,m̄-koh为tio̍h beh达tio̍h欺骗ê结果,就会利用机会中伤使徒保罗,捏造各种谣言。使徒保罗Tī chit段经文中,特别讲tio̍h家己原本thang享受一切,m̄-koh伊却甘愿放弃,只为tio̍h beh见证福音。伊hō͘哥林多教会信徒清楚知影:真正自由,是会自我约束,而且心甘情愿ê付出。Chit种自由chiah是真正自由。

第1到2节,chit两节讲tio̍h「使徒」身分ê问题。Chit种问题tī使徒保罗传福音ê过程中,一再出现。是有人专门teh使徒保罗开创ê教会散布chit种话,讲伊无跟tòe过耶稣,无算是使徒,所以,所传讲ê福音不真实,mā无权威。Mā因为tī加拉太教会中,chit种声音koh khah chē,chiah hō͘伊决定写phe去严肃警告,而该信ê踏话头mā是亲像chia仝款,讲tio̍h甚么是使徒ê身分(参考加拉太书一:1)。使徒保罗讲真正使徒,是kā福音传开来,而且因为圣神ê带领,hō͘听tio̍h ê人领受而且成做信徒。所以伊讲哥林多教会ê信徒就是伊成做「使徒」siōng好ê见证者。

第3到7节,tī chit段经文中,使徒保罗举出真chē反证来说明,就算伊接受哥林多教会hō͘伊ê报酬mā是应该ê,chit种报酬包括生活中食、lim ê需要。就算军人mā为tio̍h保护国家而the̍h军饷,á葡萄园主人mā会食家己栽种ê葡萄,顾羊人仝款会lim家己牧养ê羊ê奶等,chiah-ê lóng是一种真普通ê常识。

第8到14节,使徒保罗Tī chit段经文中继续说明伊传福音得tio̍h应得ê报酬ê正确性。伊tī第9节提起摩西律法记载tī申命记第廿五章4节,beh hō͘牛tī田里工作ê时,mā thang食田里ê草。作穑人tī田里掖种,á是收割ê时,大家lóng希望ē-tàng有所收成,chit本是应该有ê份。伊tùi chia切入主要ê问题:使徒保罗表示伊kah同齐ê同工并无án-ne要求哥林多教会ê信徒hō͘ in报酬,只有一个原因,就是无想beh造成误会,讲伊kah同工是去敛财、骗钱ê。伊进一步举出犹太人ê祭司,thang tùi献祭者所献祭ê物件中得tio̍h该得ê食物(参考利未记十:12—15,民数记十八:8—19,申命记十八:1—3),耶稣差派门徒出去传福音ê时,mā有chit种交带(参考路加福音十:7)。

重新查询 专卷研经 哥林多前书系列
错误回报,请联系