哥林多前书 7章25节 到 7章40节   背景资料  上一笔  下一笔
Chit-má使徒保罗继续回答哥林多教会信徒提起有关独身ê看法。Tùi表面起来看chit-ê问题,比起离婚ê事会khah简单,m̄-koh若认真想一下,并m̄是hiah-ni̍h单纯。因为tī chit段经文中mā提起有关已经订婚ê人,若想beh解除婚约,这就m̄是hiah-ni̍h简单。

第25到28节,使徒保罗Tī chit段经文中表示一个基本观念:结婚并m̄是罪恶,而无结婚mā m̄是错误。M̄-koh伊提醒,结婚必定会带来「种种ê拖累」,虽然伊无说明chiah-ê「拖累」是teh指甚么,m̄-koh thang理解是teh指一种负担,会有chit种看法,真可能是当时有人想beh专心传福音,却因为有家庭负担而无法度如心所愿,á是因为有家庭,致使生活负担koh khah重,而hō͘家庭出现纷争。

第29到31节,「时chūn无chē了」,chit句话是chit段经文ê中心思想。早期ê教会「末世」观念真chiok厚,认为耶稣就teh要koh来,所以ē-tàng减少任何ê负担,专心tī福音ê事工,就beh全力以赴。「现有ê chit-ê世界teh要过去à」,chit句话koh khah表明使徒保罗mā充满tio̍h末日来临ê观念。

第32到35节,tī使徒保罗ê观念中,一个人jú少世间ê挂虑,就会koh khah专心天顶ê事。伊无希望有世间ê事烦扰tio̍h人心,而无法度专心仰望天顶ê事。伊认为一个人受呼召,就是为tio̍h beh tī基督koh再临ê时chūn,kah基督「同齐活teh」(参考帖撒罗尼迦前书五:1—10)。伊希望大家专心斟酌tī基督koh再临ê事,全心、全力地为福音作siōng好ê见证。

第36到38节,chit段经文mā是ê时常受tio̍h议论ê一段经文。使徒保罗kám讲真正是beh kā大家讲无结婚khah好?甚至连订婚ê人lóng thang为tio̍h beh等基督koh再临ê缘故,kā原本已经确定ê婚事lóng取消?其实,当时ê人普遍有一种观念,就是「性」是一种罪恶ê行为,chit种观念tī基督徒ê身上特别chiok厚。结婚,夫妻会发生性ê行为。M̄-koh,有ê人结婚了,却为tio̍h beh保持所讲ê「圣洁」,而拒绝kah bó͘ á是丈夫有性行为。Koh讲,早期教会mā可能发生集体生活ê情形,虽然男女聚集做伙,m̄-koh,却无任何性行为发生,in认为ē-tàng克制家己情欲ê人,是信仰上坚定ê表现。M̄-koh,使徒保罗ê看法是:即使是家己真有抑制能力,mā bē-tàng因为án-ne就不时进行án-ne(同居)ê行为,因为这mā会成做一种诱惑、试探。Tī教会团契生活中,男女分开khiā起是必要ê。若是夫妻,就应该有夫妻共同生活ê责任,这mā是应该。若无,就m̄-thang有hō͘家己进入试探ê陷阱中。

第39到40节,chit两节经文是针对守寡ê妇女讲ê。看起来kah-ná使徒保罗对tī一直守寡ê妇人表示赞赏ê意思,其实,如果koh再对照提摩太前书第五章14节,伊讲「宁可少年ê寡妇koh再嫁,生儿育女,照顾家己ê厝」,原因是少年ê寡妇因为生理上ê需要kah上了年纪ê寡妇无仝,tùi chia就thang看出其实伊是看对象ê情况teh讲述。

请注意第39节最后一句话,讲寡妇koh再婚ê时,「应该以信徒为对象」,意思是teh指:tio̍h嫁hō͘仝款是基督ê信徒khah好。Chit句话原来ê意思并m̄是讲一定会koh再嫁hō͘「信徒」,chia所谓「以信徒为对象」,是讲如果一个信主ê姊妹守寡,想beh koh再嫁,一定tio̍h会记得家己是一个「信主」ê人。其实chit-ê观念mā是使徒保罗一贯强调ê,伊一再讲基督徒ê身上有耶稣ê「印记」(参考加拉太书六:17,chit所在用「伤痕」,表示十字架ê意思。另外参考以弗所书一:13、四:30)。

另外一方面,第39节ê「一个已婚ê cha-bó͘人tī丈夫活teh ê时chūn是受约束ê」,意思是teh指bē-tàng离婚,这kah第10节讲ê「bó͘ bē-tàng离开丈夫」是仝款ê。使徒保罗kah耶稣tī婚姻ê事顶面lóng是抱tio̍h仝款ê看法,就是丈夫往生ê时,bó͘ thang koh再嫁,如果丈夫iáu未往生,bó͘就bē-tàng koh再嫁。原因是婚姻tùi án-ne性命ê约。

重新查询 专卷研经 哥林多前书系列
错误回报,请联系