Tī前二章里，使徒保罗一再强调讲，伊m̄免智慧ê话语来传达上帝拯救ê信息。M̄-koh chit种讲法，并m̄是讲伊无重视智慧ê重要性，却是讲上帝ê拯救信息，并m̄是óa靠人ê智慧ē-tàng明白，因为拯救是属tī上帝ê事，一定tio̍h有上帝ê灵启示，人才ē-tàng晓悟。想得tio̍h上帝ê灵启示ê人，siōng基本ê条件就是beh有谦卑ê态度。骄傲ê人是bē晓悟上帝话语ê真谛。这就是使徒保罗所讲ê：「上帝偏beh拣选世人所认为愚拙ê，来hō͘聪明ê人见笑；上帝拣选世人所认为软弱ê，来hō͘坚强ê人见笑。上帝mā拣选世人所轻视、讨厌、认为不足轻重ê，来推翻一向hō͘人认为重要ê，hō͘人tī上帝面前无thang夸口口。」（一：27—29）tùi教会历史ê记录来看，chit种例一再出现，即使是tī今á日ê时代，基督教ê宣教工作iáu是充满tio̍h chit种史迹。

Tī chit-ê章经文内底，使徒保罗继续谈起第一章所提起过ê哥林多教会问题，就是教会内部有纷争，甚至分裂ê迹象。伊讲chit种现象就是信仰无成熟ê缘故，ná亲像婴á teh吸奶仝款，却无长大、茁壮。伊希望大家ē-tàng tī信仰上进步，mài koh再suh奶，而ē-tàng食饭。

Koh讲，tī使徒保罗ê书信中有一个特色，会谈起末日审判ê事。Tī chit一章经文中伊mā提起上帝ê审判，伊强调信徒一定tio̍h有好ê信仰基础chiah ē-tàng挡能tiâu上帝审判ê考验。

Tī使徒保罗看法中，出现分裂ê教会，就是信仰iáu未长大，chit种信徒，ná亲像是teh suh奶，m̄是食饭，是需要人养饲，而无法度自食其力。伊认为教会一定tio̍h清楚奠基tī上帝ê救恩上，上帝chiah是性命ê中心。

第1到2节，使徒保罗真清楚kā哥林多教会信徒讲，伊看in ná亲像iáu teh吸奶ê婴á。Chit种看法kah希伯来书teh描述伊hit-ê时代ê教会信徒仝款（参考希伯来书五：11—14），表示tī信仰ê基础上iáu真软弱。

第3到4节，使徒保罗会án-ne讲ê原因，是因为教会内部有纷争，chit种纷争是kah「嫉妒」有密切关系。Chit种纷争kah嫉妒ê形成，就是kā人当做权威，这是错误 ê态度，chit种用人当做教会信仰团契ê权威之观念是错误 ê。

第5到7节，使徒保罗tī chia强调讲，无论是属tī亚波罗派ê，á是自称属tī保罗派ê，á是其他派别ê，chiah-ê lóng仝款，tī福音事工上只不过是上帝ê奴仆而已。若是奴仆（chit-ê词等于奴隶）koh有甚么好夸耀ê？「每一个人lóng按照主所分派ê工作去做。」chit句话讲出福音事工有分类，m̄-koh无所谓toh部门重要，toh部门thang轻视。伊提出一个重要ê认bat：ē-tàng hō͘福音事工成长、发芽起来ê，并m̄是人ê能力，却是上帝。伊清楚指出就算是伊，á是亚波罗lóng仝款，只不过是上帝ê工人而已。

第8到9节，「上帝会按照每一个人ê工作报酬伊」，chit句话讲出审判ê来临，每一个人lóng tio̍h向上帝交帐。上帝清楚知影甚么人尽心尽力为福音事工努力，这kah toh一kóa人居tī hit种地位一点á关系mā无。「咱是上帝ê同工」，chit句话有两种意思：一是teh指使徒保罗讲伊kah亚波罗lóng是福音ê同工；二是teh指in两人lóng是上帝ê同工，领受上帝所hō͘ ê命令而传扬福音信息。使徒保罗tī chia beh表达一个信仰基本观念：所有ê基督徒lóng是「上帝ê奴仆」，是kah上帝同工。