哥林多前书 16章1节 到 16章12节   背景资料  上一笔  下一笔
使徒保罗一直无bē记得耶路撒冷教会内有贫困信徒tú-tio̍h生活困境ê问题。所以伊每到一个所在,教会开拓起来后,就劝勉信徒tio̍h奉献济助耶路撒冷教会ê贫困信徒。伊会án-ne用心tī chit件事顶面,主要是beh hō͘耶路撒冷教会信徒bē用鄙视(siùⁿ)ê眼光看待外邦人ê教会,而ē-tàng感受tio̍h外邦教会ê信徒mā是真有疼心,会关心贫困者ê需要,这就是teh实践耶稣ê教示,mā是teh完成摩西律法ê「爱人如己」ê规律。Koh讲,伊认为犹太人基督徒分享属灵ê恩赐hō͘外邦人,外邦人信徒就应该tī犹太人物质生活上ê欠缺hō͘ in必要ê资助(参考罗马书十五:25—27),换句话讲,这是外邦信徒应该有ê责任。

使徒保罗希望哥林多教会信徒会先准备好beh捐助耶路撒冷教会信徒ê需要,伊可能会亲自去访问in,m̄-koh mā可能会派该教会所熟悉ê人去the̍h,chit种人应该就是第10节所提起ê提摩太。伊希望真正ē-tàng实chit-má去访问哥林多教会。

第1到4节,使徒保罗Tī chit段经文就真清楚讲tio̍h伊ài哥林多教会准备好beh捐助hō͘耶路撒冷教会ê钱。第1节提起伊bat吩咐加拉太教会ê信徒án-ne做(参考加拉太书六:9—10)。M̄-koh tī hō͘加拉太教会ê书信中,并无明确讲出ài怎样救助耶路撒冷教会信徒,m̄-koh却提起大家「tī信仰上同属一间ê人」,因此就应该tī公众ê「善事」上互相协助。这是一件重要ê认bat:大家lóng是一家人,彼此互相关心。虽然属tī无仝ê族群、教会系统,m̄-koh lóng是属tī耶稣基督ê信徒,chit-ê认bat是非常重要ê。chit-má使徒保罗要求哥林多教会信徒,tio̍h用存「小钱」ê方式来累积救助ê捐款。伊采用每一个礼拜日参加聚会ê时chūn,就「按家己ê收入照比例拨出一kóa钱,积存起来」。伊之所以án-ne建议,是无希望等伊到哥林多教会ê时,大家chiah想办法beh khêng救助ê款项。续落来伊讲in ē-tàng选派thang信任ê人将此款项带到耶路撒冷去。这mā thang看出早期教会对tī财物lóng真小心,因为奉献ê金钱一定tio̍h非常审慎处理,稍一不慎可能就会hō͘教会chit-ê信仰团契发生彼此m̄信任ê问题。

第5到7节,原本tī第4节记载使徒保罗讲「如果需要」伊亲自行一chōa哥林多,伊真愿意。可能时间上有困难,á是行程iáu未确定,m̄-koh可能会路过而已。其实,tī第四章19节伊就án-ne讲过:「总是,主若允准,我liâm-piⁿ to̍h会去lín hia。Hit 时,我to̍h 会知hiah-ê骄傲自大ê 人teh 讲甚么话,mā 会知in ē-tàng 做甚么。(全民版)」tī第十一章34节,伊koh讲:「若有人iau,tio̍h tī 厝里先食,chiah免得聚会ê 时soah 变做受上帝审判。其他ê tāi-chì,等我去lín hia ê 时chiah 来解决。(全民版)」咱thang想像会tio̍h使徒保罗是一再期待,希望ē-tàng到哥林多教会去一chōa。根据使徒行传第十九章21到第二十章3节,使徒保罗确实达成了chit-ê心愿,而且tī哥林多教会tòa三个月久ê时间。这就是伊tī第6节所讲ê过了一个寒天,因为每年ê十一月到隔年ê三月,有长到四个月时间,海上风涌强劲,无适合船只航行ê缘故。Koh讲,伊离开哥林多真可能tī时间上mā是提前,因为tī哥林多有人准备ài杀害伊(参考使徒行传二十:3),所以逼hō͘伊一定tio̍h提前离开tńg去马其顿。

第8到9节,chia提供了真重要ê资料,就是使徒保罗一直留tī以弗所。Án-ne,chit封写hō͘哥林多教会ê书信,就是tī以弗所停留期间所写ê。根据使徒行传第二十章31节ê记载,伊tī以弗所停留长到三年之久,ē-sái讲是伊tī外邦人地区宣教停留siōng久长ê所在。Tī第9节讲以弗所ê门「大开」,意思是有真好ê传福音机会。对tī传福音ê工作者来讲,掌握机会是非常重要ê。

第10到12节,使徒保罗tī chia提起可能会派提摩太到哥林多教会去。提摩太是使徒保罗第二pái传福音ê时所得tio̍h一位少年传福音ê同工。伊是路司得ê人,老母友妮基、外祖母罗绮lóng是犹太人(参考提摩太后书一:5),老父是希腊人。提摩太tī路司得kah以哥念lóng受信徒ê o-ló,使徒保罗带伊同行传福音ê时,为tio̍h减少不必要ê困扰,mā为伊行了割礼(参考使徒行传十六:1—3)。使徒保罗非常喜爱提摩太,甚至称伊是「tī信仰上ê真kiáⁿ」(提摩太前书一:2)。使徒保罗先差派提摩太去访问哥林多教会,希望该教会ê信徒ē-tàng好好á款待提摩太。伊之所以差派提摩太,是肯定伊ê工作能力。Tī哥林多前书第四章17节使徒保罗就bat肯定过提摩太,可见使徒保罗对伊真信任。

Chia mā提起亚波罗,伊是出身亚历山大城ê人,真有口才,而且对圣经非常熟悉。欢喜传福音,后来得tio̍h百基拉kah亚居拉ê帮忙,tī传福音ê事工上有真好ê见证(参考使徒行传十八:24—28)。Tī第一章十二节提起哥林多教会结党分派ê中间,有一阵人是非常拥护亚波罗ê。可见伊tī哥林多教会bat lóng受礼遇kah尊崇。使徒保罗知影亚波罗对哥林多教会有影响力,所以希望伊ē-tàng协助该教会,á是处理一kóa教会ê纷争。可惜ê是,亚波罗tī时间上有困难。


重新查询 专卷研经 哥林多前书系列
错误回报,请联系