哥林多前书 14章1节 到 14章25节   背景资料  上一笔  下一笔
哥林多教会信徒可能有bē少人对讲灵语有执迷ê倾向,产生一种特有ê怪现象,就是大家kah-ná teh比赛,看甚么人比较有圣神ê恩赐,ē-tàng讲出比别人koh khah chē ê灵语,á是讲灵语用ê时间比较长。使徒保罗认为如果信仰是用来比较ê,he是对基督教信仰ê 错误认bat。如果信仰是用来夸耀家己ê灵性ê,he确实是误解了基督教信仰ê本质。

Tùi kui本圣经thang看tio̍h基督教信仰siōng中心ê信息,就是学习知影家己是一个罪人,需要上帝ê怜悯kah救恩。Á这救恩就是tī耶稣ê身上表明出来。因此基督教信仰是帮助一个人知影悔改信耶稣。Kā chit点掠tiâu,就会明白为甚么使徒保罗会用chiah-ni̍h chē篇幅说明有圣神恩赐ê人应该有ê态度。

Tī头前使徒保罗已经真清楚说明,无论有甚么才华,lóng是tùi上帝来圣神ê赏赐,koh讲,所有ê人lóng是基督ê肢体,大家lóng是连结tī基督ê身躯上。无任何一个肢体会讲家己是比别ê肢体koh khah重要,因为若有一个肢体痛苦,即使是siōng弱小ê肢体,mā会hō͘ kui个肢体同苦。所以彼此互相帮助chiah是属tī基督肢体ê信徒应该有ê认bat。chit-má chit段经文中,使徒保罗进一步说明哥林多教会ê信徒中,有人强调讲灵语(方言)ê重要性,使徒保罗认为无任何一个chiah ē-tàng是比别ê chiah ē-tàng重要。因为即使会讲各种方言,若是无爱,就无甚么意义thang讲。所以tī chit段经文中,伊特别劝勉hiah-ê会讲灵语ê人,ài会晓tī甚么时chūn讲?讲ê内容应该kah见证上帝tī耶稣里ê救恩有关chiah重要。

第1到4节,chia一开始使徒保罗就讲「Lín tio̍h追求疼」chit句话,已经清楚讲出第十四章ê基本内涵。使徒保罗beh指出哥林多教会真正ê问题,是大家彼此teh互相比较、竞争。欠缺包容kah互相鼓励、分享ê疼。Á siōng大ê问题,莫过就án-ne tī信仰ê事顶面比长短。续落来,使徒保罗先区分了讲灵语kah讲起帝信息二者之间ê差别;讲灵语是对上帝讲ê,讲起帝信息是对众人讲ê。前者是造就家己,后者是造就众人,mā等于teh帮助全教会。

第5到6节,tī chit两节中,使徒保罗表明家己对chit种因为会讲灵语而造成教会纷争ê事ê看法,伊认为ē-tàng帮助教会ê,是上帝ê信息,并m̄是讲灵语。伊讲如果一个人会讲灵语,却无带hō͘信徒帮助,án-ne讲灵语就对别人无特别ê益处。

第7到12节,tī chit段经文中,使徒保罗引用乐器做譬喻来说明教会信仰团契。伊讲如果只有一种声音,却无分别高低,就听bē出奏出ê是甚么作曲。伊讲灵语ê人mā是án-ne,若是无人听bat所讲ê灵语,ná亲像teh听外国人讲话仝款,完全听m̄-bat,就无法度得tio̍h帮助。所以追求上帝圣神ê恩赐,就应该是追求ē-tàng造就koh khah chē人ê「恩赐」chiah正确。可见使徒保罗所看ê,并m̄是某一个人ê能力,却是teh看整体教会ê利益。

第13到17节,使徒保罗tī chia强调tī信仰团契中,就是beh帮助别人á是讲彼此互相帮助,chit种信仰chiah会有意义,mā会带hō͘教会利益。所以做一个会讲灵语ê人,teh聚会中只有讲家己听bat ê灵语,别人lóng听m̄-bat,就算chit-ê人家己真满足kah上帝之间藉tio̍h灵语交通,对别人来讲mā bē有任何益处。

第18到19节,使徒保罗hō͘哥林多教会ê信徒知影,伊真有讲灵语ê恩赐,m̄-koh伊宁可讲五句帮助别人明白,mā m̄-thang讲千万句别人听m̄-bat ê灵语。

第20到21节,伊劝勉哥林多教会信徒,ài tī思想上成熟像大人,m̄-koh tī「pháiⁿ事顶面tio̍h亲像婴á」,这表示有纯洁ê心,ná亲像婴孩仝款,无pháiⁿ ê念头,自然就bē有害人ê行为出现。伊引用以赛亚书第廿八章11节以下ê经文,表示上帝藉tio̍h先知讲话hō͘以色列人民听,m̄-koh in m̄听。上帝只好藉tio̍h外国人来传讲伊ê信息hō͘以色列人民听,m̄-koh in iáu是无想beh悔改,因为听m̄-bat。使徒保罗用chit种隐喻ê方式,teh说明:讲灵语ê人,ná亲像讲人家听m̄-bat ,án-ne,koh怎样ē-tàng见证福音ê信息?意思是teh指对传福音并无任何帮助。

第22到25节,tī chia,使徒保罗kā哥林多教会信徒讲,teh聚会ê时chūn,就tio̍h考虑in中间是m̄是有初信ê,á是iáu未信ê人?若是有,就m̄-thang讲别人听m̄-bat ê灵语,因为对in teh追求信仰ê事顶面无帮助。

重新查询 专卷研经 哥林多前书系列
错误回报,请联系