哥林多前、后书lóng是使徒保罗写ê书信，主要是谈论到有关基督徒生活kah信仰之间ê问题。Tī使徒保罗所写ê书信中，写hō͘哥林多教会ê书信占有真重要份量。前后两份书信共计有廿九章，讨论ê范围非常真阔。Tùi使徒行传第十八章1到4节thang看tio̍h使徒保罗到哥林多城，tī hia tú-tio̍h亚居拉kah百基拉chit对夫妻，因为in kah使徒保罗lóng是「靠制造帐棚维持生活」，所以in tī哥林多成做真好ê福音同工。Tī使徒行传第十八章第4节讲：「Ta̍k个安息日， 保罗lóng tī 会堂kah 人辩论，苦劝犹太人kah 希腊人来信主。(全民版)」Chit节讲出使徒保罗奠立了哥林多教会ê基础。原本使徒保罗是「靠制造帐棚维持生活」，后来因为西拉tùi腓立比ê教会带来一笔信徒ê奉献（参考哥林多后书十一：8—9），使徒保罗teh生活无虑了后，就kā全部ê时间投入传福音ê事工上（参考使徒行传十八：5）。

哥林多是希腊ê大城市，是罗马帝国统治下属tī亚该亚省ê首都，mā是一个非常繁华ê城市，不过社会风气非常败坏，道德低落，是一个多宗教信仰ê城市。Chiah-ê社会败坏ê现象mā发生tī教会内部，使徒保罗听tio̍h后感觉非常ê痛心，当伊tī以弗所三年ê福音事工teh beh结束，准备ài离开chìn前写chit封册，目的就是beh处理信徒tī信仰kah生活中所发生ê问题，并且透过此书信劝勉大家应该彼此相疼，因为每一个信徒lóng是上帝福音ê同工。

Ná亲像现代人写phe ê时会有一定ê样式，古代人tī chit方面koh khah是án-ne。新约圣经时代写phe lóng会先自我绍介，写明收phoe ê对象，然后是写上请安语。使徒保罗ê书信mā是循tio̍h chit-ê模式。

第1节，使徒保罗所写书信ê特色，伊自称是「基督耶稣ê使徒」，tī伊ê书信中一再出现chit种话句（参考罗马书一：1，加拉太书一：1，以弗所书一：1，歌罗西书 一：1，提摩太前书一：1、后书一：1，提多书一：1）。伊之所以每写一封书信就自称「使徒」，原因是tī伊离开开拓起来ê教会了后，真紧to̍h有人去传「另外一种福音」（参考加拉太书一：6），chiah-ê传「另外一种福音」ê人，siōng欢喜讲使徒保罗无「使徒」ê身分。若照使徒行传第一章22节记载有关拣选「使徒」ê条件，使徒保罗确实是无「使徒」ê资格。M̄-koh ná亲像伊写hō͘加拉太教会ê书信中所讲ê，伊之所以自称做「使徒」，并「m̄是因为人ê选召，mā m̄是受人ê委派，却是耶稣kah Hit位 hō͘他tùi死里koh活ê父上帝指派ê」（参考加拉太书一：1）。

Chia提起「所提尼」chit-ê兄弟，chit-ê名只tī chia出现，伊真可能就是使徒行传第十八章17节记载ê hit位tī哥林多城管理犹太人会堂者，因为使徒保罗tī hit-ê城ê犹太人会堂传讲耶稣ê福音，激怒犹太人，in掠tiâu伊，殴打伊。可能后来in因为听tio̍h使徒保罗所传讲ê福音，á是听tio̍h亚波罗传讲ê福音信息而归属信耶稣。

第2节，chit节真重要，chit节已经讲出普世教会ê观念，to̍h是所有信耶稣ê信徒，lóng是属tī「上帝教会ê信徒」，lóng是用基督为元首（参考以弗所书一：22）。

Tio̍h注意ê是chia ê「信徒」一词，表示「分别为圣」ê意思，kah一般人是无仝款ê。换句话讲，tī主耶稣内面，所有ê信徒lóng是属tī上帝ê子民，是神圣ê子民。而且tī耶稣里成了合做一个ê团契，是仝一个家庭ê份子。使徒保罗会án-ne讲，一定kah教会内部ê分裂事件有关。

第3节，chia讲出当时书信ê模式，就是请安kah祝福。Chia讲「恩典」，表示tùi上帝来ê赏赐，chit种tùi上帝来ê赏赐，是无法度用任何代价来换得tio̍h，却是上帝tī耶稣里白白hō͘ in ê。「平安」，chit-ê词m̄是表示无tú-tio̍h任何问题，却是指性命充满tio̍h饱足、欢喜，而且满有活力ê意思。