Chit章主要描述扫罗领兵teh对抗非利士人ê时chūn，伊kah三个kiáⁿ lóng因为án-ne战死战场。详细ê情景thang参考撒母耳记上第三十一章。Mā thang看出chit章是为第十一章ê大卫王朝故事作准备。详细kā chit章对照撒母耳记第三十一章所记载ê，就会发见两章ê内容是大同小异，只是历代志ê作者以第13到14两节，讲扫罗王会战死ê原因，是对上帝不忠ê缘故。Chit点mā是历代志作者编辑chit本册ê中心思想，kah列王记ê作者态度仝款。In lóng有一个共同ê观点：对上帝忠实，chiah是生存ê唯一之道。弃sak上帝，弃sak上帝ê教示，等于自取灭亡。伊以扫罗「求问死人ê灵，而不求问上主」来说明扫罗ê家族kah tī in统治之下，以色列人民tú-tio̍h灾难ê原因。作者主要目的是beh警惕后代ê统治者，chit点thang tùi作者用「因为án-ne上帝刣死伊」chit句话看出来，扫罗ê死，其实就是上帝ê意思，为tio̍h是beh惩罚伊ê背叛。

Tī撒母耳记上第廿八章1节就先提起「非利士人召集军队攻打以色列人」，然后tī第廿九章1节讲：「腓利士人聚集in ê 军兵来到亚弗；以色列人扎营tī 耶斯列ê水泉边。(全民版)」续落来tī第11节koh讲「非利士人继续向耶斯列进军」。chit-má chia讲两军tī基利波山相战。Á以色列人死伤惨重。

第1节，非利士人ē-sái讲是以色列人民进入迦南地khiā起了后，siōng大ê威胁，in不时搅扰、侵犯以色列人，而且统治ê时ê手段非常强猛。Chia讲in kah以色列人民相战，以色列军队是死伤惨重，大家lóng逃走à。Chia讲连国王扫罗kah伊ê三个kiáⁿ mā lóng逃走。

第2到3节，chit两节讲扫罗tī逃走途中因为被箭射中而受了重伤，而伊ê三个kiáⁿ：约拿单、亚比拿达，kah麦基・舒亚等lóng被非利士人刣死。

第4到7节，扫罗因为身受重伤，伊无想beh被非利士人刣死，就请伊ê侍卫kā伊刣死，因为伊惊被俘掳ê时，iáu会hō͘凌辱。Ē-sái讲是伊ê侍卫m̄敢对伊下手，扫罗只好家己动手，伊伏tī家己ê刀上「自刣」。就án-ne结束loh扫罗ê统治时代，mā因为án-ne，耶斯列城ê以色列人民lóng弃城逃走，hit-ê城因为án-ne陷入非利士人手中。