Chit段经文mā是讨论到有关耶路撒冷teh beh tú-tio̍h毁灭ê事，m̄-koh却以两个人来做预言ê材料。Tùi第15到19节，这是用宫廷大臣舍伯那，第20到25节，是用以利亚敬作题材。

第15节，「宫廷内务大臣舍伯那」，这官职真大，等于是宰相ê位阶治理国政，是国王之下ê大主管。Tī第三十六章3节记载，tī希西家王时代，舍伯he是担任王室ê书记。

第16节，「你是甚么人」，chit句话有指责ê意思，表示舍伯那做超越伊ê职权ê事。理由是舍伯那「竟然敢tī山边石磐中为家己挖坟」，这是teh指王室ê坟穴，只有王室家族ê人chiah拥有chit份殊荣。显然地，舍伯he是利用家己ê权位，竟然敢tī王室ê墓穴中私自为家己预先占有坟地。作者用chit种方式teh表示舍伯那有贪婪ê行为。

第17到19节，舍伯那 ê问题在tī自认重要，m̄-koh tī上帝眼中，伊却tio̍h因为án-ne而丢官。Chia讲舍伯án-ne beh死tī「伊一向引认为荣ê战车边á」，意思是teh指伊ná显示tio̍h荣耀ê社会地位之súi座车，kā kah伊同齐被掠到外国（大国）去，成做他国ê俘虏kah战利品。Á chit种预言mā teh kā舍伯那讲伊往生ê所在，根本就免得坟墓，会死tī异乡之地。Á受掠ê人就无甚么地位thang讲，chia用「捏成一团」来表示。

第20到22节，chia提起「以利亚敬」，伊mā是当时希西家王时代ê王室总管，kah舍伯那、国史大臣亚萨ê kiáⁿ约亚等三人，teh代表耶路撒冷去kah亚述ê西拿基立谈判（参考以赛亚书三十六：3、11）。先知以赛亚讲，以利亚敬是上帝ê「奴仆」，teh表示上帝看中、拣选。因为án-ne，伊kā取代舍伯那 ê位置。上帝beh用以利亚敬来协助国王治理犹大王国。Tī chia用「朝服」、「腰带」，kah「锁匙」等来表示官职ê阶级。

第23节，表示以利亚敬会带hō͘犹大国ê稳定，像用「钉子钉牢仝款」ê稳固。相对tī舍伯那所带来ê是动荡不安。因为以利亚敬被拣选出来治理国政，为tio̍h án-ne，in家族ê人lóng因为án-ne而享受荣耀。

第24到25节，chit两节有可能是后代加笔添上。Á chit节讲出以利亚敬原本ē-tàng好好á治国，m̄-koh却因为「伊ê厝内人kah亲属tio̍h成做伊ê重担」，原因是chiah-ê家属kah亲人bē记得一件非常重要ê认知：m̄是以利亚敬有甚么能力，却是上帝拣选。原来以利亚敬ê家族认为ē-tàng想beh án怎to̍h án怎，利用伊ê名采行特权，图利家己。结果反成做以利亚敬ê「重担」。结果就丧失继续统治ê机会。