1.第六章：
罗马书tùi第一章18节开始到第三章20节，是谈起有关人犯罪，致使kah上帝之间出现隔阂。然后tùi第三章21节起，直到第四章25节，lóng是teh谈一个人ê所以ē-tàng kah上帝重新和好，是因为耶稣十字架救赎ê缘故。续落来tī第五章讲咱是因为信耶稣á得tio̍h上帝拯救ê恩典，这恩典是来自上帝白白ê赏赐，并m̄是人ê努力á是功劳换取到ê。

罗马书ê第六章到第八章39节，是使徒保罗teh解释一个信耶稣ê信徒，应该有ê信仰态度kah认知。Tī chit段长到三章篇幅ê经文中，伊tī第六章细讲人án怎tùi罪ê奴役中脱离，得tio̍h性命ê真自由。然后第七章伊koh再解释怎样tùi律法ê诅咒下得tio̍h真正自由，同时，伊mā kā家己ê心灵作了一个彻底告白，hō͘咱知影人有多软弱。续落来tī第八章，伊讲tio̍h怎样tī圣神ê带领下，成做一个有真实性命ê人。

使徒保罗tī第六章谈起一个性命有基督同在ê人，是有koh活性命ê人，伊讲chit种人就是脱离罪恶ê人。使徒保罗真正用意，是beh指出当人透过律法，知影所犯ê罪jōa-ni̍h-á重，就会想tio̍h上帝赏赐ê恩典，而且白白得来ê时，就koh khah应该tio̍h知影谦卑，而且会用感恩ê心来领受，án-ne chiah是正确ê态度。

2.第六章1到14节：
使徒保罗Tī chit段经文中，一再强调一个信耶稣ê人，等于kah耶稣ê性命相连结，m̄-nā kah耶稣同死，mā kah耶稣同koh活（参考第8节）。使徒保罗强调：信仰，是性命ê连结。若是kā信仰kah性命分离，hit种ê信仰就ná亲像穿衫仝款，随时thang更换。M̄-koh若是kā信仰kah性命连结做伙，án-ne就等于人ê身躯kah灵魂仝款，是bē-tàng分割ê。因为án-ne，chit段经文ê主题就是teh kah耶稣「合做一个」ê基督徒。一个真正信靠耶稣ê人，无koh是原来ê家己，却是性命中有耶稣ê形象，kah耶稣亲密结合做伙ê人，伊kah耶稣同齐同钉十字架，mā同齐koh活。Chit种人会拒绝作罪恶ê奴隶，因为伊已经kā家己献hō͘上帝了。这mā是使徒保罗所常用ê：成做「新造ê人」（参考哥林多后书五：17、加拉太书六：15、以弗所书二：15、四：17—24）。

第1到4节，tùi第1节就thang看tio̍h有人确实是误解，á是讲故意扭曲使徒保罗所讲ê上帝tī耶稣内面拯救恩典ê意思义。原因是tī第五章20节所提起ê「罪jú增多，上帝ê恩典mā koh khah丰富」Chit句话。这mā tùi第三章8节伊也bat提起chit种问题。使徒保罗真清楚表明了，罪，hō͘人ê性命死亡。死去ê人怎样ē-tàng继续犯罪？无可能ê事。伊讲，一个真正kah耶稣连结ê人，就是kah耶稣同死tī十字架顶，m̄-koh却因为耶稣ê koh活，mā跟tòe同齐koh活，chit种koh活就是过tio̍h新ê生活样式。

第5到10节，chit段经文一再强调kah耶稣「合做一个」ê重要性，表明了ê是一个人若真正信耶稣是性命ê救主，chit-ê人就是kah耶稣无分离ê人，伊必定tī信仰上真清楚，是kah耶稣同死，mā会和耶稣同koh活。Chit种人，就是脱离了死亡威胁ê人。是一个无死ê人，á现在活teh，是「为上帝á活」。使徒保罗chit种讲法tī加拉太书第二章20节mā出现，伊讲：「现在活teh ê无koh是我家己，却是基督tī我性命里活teh。我现在活teh，是藉tio̍h信上帝ê Kiáⁿá活；伊疼我，为我舍命。」

第11节，使徒保罗强调一个kah耶稣连结ê人，就一定tio̍h kā家己当做是已经是死去ê人仝款，是过去tī罪恶中ê人已经死去à，现在活teh ê我，是因为有上帝tī耶稣内面ê救恩á活。伊一再用「为上帝á活」，chit句mā thang讲成「tī上帝内面活着」，因为上帝就是行伟大神迹者，他hō͘死á埋葬ê耶稣，koh活过来。Koh活，就是永恒ê性命。因为án-ne，当一个人kah耶稣「合做一个」了后，藉tio̍h耶稣ê koh活，信ê人，mā就跟tòe耶稣koh活起来，这就是tī上帝内面活着。因为án-ne thang án-ne了解，一个信耶稣ê人，就是时刻会想tio̍h上帝就tī伊性命中，就ná亲像使徒保罗siōng欢喜讲ê，是有耶稣活tī伊ê性命里。

第12到14节，这三节经文thang讲为头前ê经文做一个总结。使徒保罗beh厘清一个重要ê观念，并m̄是讲一个信耶稣ê人已经脱离了罪，就认为tùi án-ne bē koh再有罪ê问题出现。Ná亲像头前已经讲述过ê，脱离罪ê束缚，是离开了罪ê主宰，m̄-koh却tùi án-ne成做罪ê对敌者。因为án-ne，需要不时kah罪对抗。伊讲一个信耶稣ê人，是无koh作「邪恶ê工具」，却是成做「公义ê器皿」。这是相对句，「工具」kah「器皿」lóng是teh指「武器」ê意思。使徒保罗甚至讲beh穿上帝所赐ê「全副武装」，为tio̍h是beh对付罪恶ê诱惑（参考以弗所书六：10—13）。注意这处圣经所讲ê「公义」，指ê就是「规范」，mā就是属tī上帝教示ê准则。上帝ê「规范」包含了怜悯、赦免、慈爱、公正。「公义」包括了基督徒应该有ê siōng基本之伦理行为。